Nangayo na og pasaylo kadtong MAPEH teacher sa Grade 10 night class sa Don Vicente Rama Memorial National High School, Barangay Basak Pardo, Cebu City ngadto sa ginikanan sa duha ka mga tinun-an nga lalaki sa matod pa iyang gipamaak.
Ang maong maestro miatubang ngadto sa mga ginikanan sa mga biktima nga iya ra sab nga mga estudyante, atubangan ni Basak Pardo Barangay Captain Dave Tumulak, Martes sa buntag, Septiyembre 3, 2024.
Sa sayo pa, nag-viral sa social media ang video sa maong magtutudlo nga nangasaba sa iyang mga estudyante nga giingong nasuko kay wa mosanong sa iyang mando ang duha ka mga lalaki nga tinun-an nga ipakita ang ilang abs.
Usa sa biktima nga 17 anyos nga ang amahan usa ka polis ang mitunga sa buhatan ni Kapitan Tumulak ang nagkanayon nga na-trauma ang iyang anak sa maong hitabo niadtong Biyernes sa hapon, Agosto 30, 2024.
Saysay sa amahan nga way nahimo ang iyang anak tungod sa kahadlok ilabi na nga gihulga nga ihagbong sa klase.
NANGGIGIL
Base sab sa pamahayag sa ubang classmates nga gisimhot simhot ni ‘sir’ ang biktima dayon gikalitan niini og paak ang tangkugo sa maong tinun-an.
Samtang ang inahan sa laing biktima nga 14 anyos nga lalaki mitug-an sa mga tigbalita nga dili na ganahan mo-eskuwela ang iyang anak.
Asoy sa niini nga taodtaod nang nagreklamo ang iyang anak ngadto ni ‘sir’ nga gipaak sab sa maong maestro.
“Gimandoan niya (suspek) ang students nga mopiyong sa ilang mga mata, kay motan-aw siya sa kinatawo sa biktima (14 years old student,” sigon pa sa inahan.
Tungod sa kauwaw ang biktima wa motugot nga ipakita ang iyang private part, hinungdan nga naglagot ang maestro og giingong nanghagis pinaagi sa pagbunal sa lingkoran sud sa classroom.
RASON NI SIR
Bisan tuod nga nangayo og pasaylo ang suspek ngadto sa mga biktima ingon man sa mga ginikanan niini atol sa pakig-atubang sud sa barangay hall sa Basak Pardo, mihimakak kini sa pasangil nga iyang gipaak ang iyang mga estudyante.
Pangatarungan niya nga napandol siya niadtong higayona ug mamumo ngadto sa bukobuko sa biktima hinungdan nga iyang napaakan.
Sa dihang gisuwayan ang maong suspek sa pakighinabi sa mga sakop sa media mikaratil kini og dagan gawas sa barangay hall.
Sa habig sa tunghaan, si Noel Nacorda, head teacher II mipahibawo nga mihimo na sila og imbestigasyon nga ilang i-submit ngadto sa buhatan sa Department of Education (DepEd) alang sa himuong aksiyon.
Tug-an ni Nacorda nga dili kini maoy unang higayon nga nakasugat sa maong akusasyon ang maong magtutudlo kay mao kini hinungdan nga nataktak sa duha ka mga naunang tunghaan nga iyang kanhi gi-alagaran, gumikan sa reklamo sab sa mga estudyante sa iyang binuhatan.
Ang ginikanan sa mga biktima nagtinguha nga mosang-at og reklamo nga R.A. 7610 kon mahitungod sa child abuse. / GPL