HUBOG nga mag-agaw pulos gipaslak sa prisohan human nga giingong nagmaoy ug sa dihang niresponde ang sakop sa Naga City Police Station giluok pa sa babaye’ng suspek ang policewoman sa dihang gipasakay sa patrol car.
Ang maong insidente nahitabo sa Barangay East Poblacion, Naga City niadtong Hunyo 29, 2025.
Ang mga dinakpan gitago sa pangala’ng alyas Angelo, 33 ug alyas Anna, 33, pulos lumolupyo sa Purok 1A, Barangay Ocaña, Dakbayan sa Carcar.
Migawas sa imbestigasyon sa Naga Police Station nga nakadawat ang ilahang buhatan og tawag gikan sa City Disaster Risk Reduction and Management Office (CDRRMO) nga nangayo og police assistance gumikan sa nahitabong kagubot sa maong lugar.
Naabtan sa mga polis ang maong mag-agaw nga nagwala nga nakamugna og istorbo sa maong dapit.
Gisuwayan pa og hangyo sa mga polis nga mokalma ug gitambagan nga mopauli na gumikan sa ilang kahubog inay nga mopatuo nag syagit-syagit na hinuon hinungdan nga gipangpusasan kini sa mga kapulisan.
Sa dihang gipasakay sa police patrol car giingong kalit nga gibira ni Anna ang policewoman dayon gituok hinungdan nga nagkaguliyang.
Nasayran nga giingong nanghagad og inom si Anna ngadto sa iyang ig-agaw aron nga mopahungaw sa iyang gihambin nga problema.
Sa dihang nangahubog na ang duha, giingong nawala ang bag ni Anna nga adunay mga importante nga dokumento hinungdan nga ila kining gipangita apan wa kini makit-i hinungdan nga nagsyagit-syagit.
Si Anna miangkon nga nadala lang siya sa iyang kahubog hinungdan nga nabuhat niya ang maong salaod.
Tungod niini mag-atubang ang mga dinakpan og kasong Alarm and Scandal ug Direct Assault. / JDG