Mag-live-in partner nga giila nga big time drug pusher sa lungsod sa Argao ang nadakpan sa buy-bust sa Argao Municipal Police Station alas 10:11 sa buntag, Biyernes, Agusto 21, 2026 sa Barangay Binlod sa maong lungsod.
Ang mga suspetsado giila nga silang Norlyn Suico, 47, taga Binlod ug ang iyang kaipon nga si Argine Chiong, taga Barangay Poblacion, lungsod sa Ronda.
Nasakmit sa mga operatiba sa Argao Police Station ang pinakete nga gituohang shabu nga motimbang sa 110 gramos nga dunay standard drug price nga P748,000.
Giingong taod-taod na nga gi-monitor sa kapulisan ang duha human nabaniog ang ilang negosyo sa illegal nga drugas.
Human makuha ang tanang impormasyon gilusad dayon ang anti-illegal drug operation.
Sila matod pa ang tig-supply sa illegal nga drugas sa mga silingang lungsod sa Argao ug sa bukirang mga barangay.
Si Norlyn ug Argine nadakpan na kaniadto sa illegal nga drugas ug nakagawas human maka plea bargain.
Giandam na ang kasong kalapasan sa Section 5 ug 11, Article II, Republic Act 9165 nga ipasaka batok sa duha. / AYB
