Mag-uuma gitigbas sa silingan, patay

Namatay diha-diha ang usa ka 63 anyos nga mag-uuma human gitigbas ang nagkadaiyang bahin sa iyang lawas sa usa ka 18 anyos nga ulitawo nga giingong nangawat.

Ang pagpanigbas nahitabo alas 11:30 sa buntag sa Sabado, Pebrero 17, 2024, sa Sitio Pancil, Brgy. Cambanjao, siyudad sa Bais, Negros Oriental.

Ang biktima giila nga si Cristito Devalge samtang ang suspek giila nga si Maxile Pealago.

Ang Bais City Police Station nakadawat og tawag sa telepono nga nagpahibalo sa kaso sa pagpanigbas.

Sa ilang pag-abot sa dapit, ilang nasuta nga patay na ang biktima.

Nasayran sa Superbalita Cebu pinaagi kang Police Lt. Stephen Polinar, spokesperson sa Negros Oriental Police Provincial Office (NOPPO), ang suspek nasuko sa biktima kay gipasanginlan siya nga nangawat og manok.

Samtang ang biktima didto duol sa iyang uma, ang suspek kalit nga nitumaw ug gitigbas sa nagkadaiyang bahin sa lawas ang biktima gamit ang sundang.

Samtang ang suspek nadakpan dayon sa kapulisan sa hot pursuit operation ug mag-atubang og kasong murder.