Gimanduan ni Cebu Governor Pamela Baricuatro ang sakop sa Provincial agriculture Office ug uban pa'ng ahensiya ug opisina sa pagseguro sa pagpangandam sa Super El Niño nga moepekto sa nasod sa uwahing semana sa Nobiyembre
hangtod sa 2027.
Kabahin sa pagpangandam niini ang pagpahibawo daan sa mga mananagat, mag-uuma, ug uban pa'ng mga sektor nga mopaubos sa mga programa sa gobiyerno aron adunay insurance ang panginabuhian niini.
Matod ni Dr. Roldan Saragena, Provincial Agriculturist, nga prayoridad sa maong programa ang mga gagmay nga mag-uuma nga maoy unang maigo sa dili maayong kahimtang sa panahon.
Subay niini, ang Kagamhanan sa Probinsiya sa Sugbo migahin og P34 milyunes alang sa insurance program.
Samtang moapudapod sab kini og 500 ka mga boxes sa organic fertilizer sa mga lokal nga kagamhanan sa Sugbo aron pagsuplay sa Food Always in the Home (Faith) program nga nag-engganyo sa mga Sugboanon pagpananom og utanon ug lagutmon sa ilang tugkaran.
Giawhag sab ang mga mag-uuma sa paggamit og organic fertilizer nga makatabang sa pagpatambok sa yuta.
"Kaning organic fertilizer mura ni'g sponge. Sa panahon sa ting-uwan, mo-conserve ni og tubig, and kon imong yuta rich sa organic fertilizer, dugay na siya mauga," matod ni Saragena.
Gilaraw sab sa kagamhanan ang pagpalit og water pumps, plastic drums, ug garden hoses alang sa agricultural production sama sa Dalaguete, Alcoy, Oslob, ug Argao.
Mag-apudapod sab og mga pesticides aron pagpangandam sa posibleng pagdagsa sa mga mananap atol sa huwaw.
Alang sa fisheries sector, mag-install sab og 102 nga dugang devices nga makatabang sa pagsustener sa mga mananagat sa ilang panginabuhi.
Una na nga gipahibawo sa kagamhanan ang pagtumaw sa Super El Niño diin gilauman ang sobra nga kainit, posibleng pagkauga sa yuta, ug pagminos sa suplay sa tubig sa maong mga higayon. / ANV
