Gipakaging sa Orlando Magic ang Eastern Conference ug overall leaders Cleveland Cavaliers, 108-103, sa sulod mismo sa balwarte niini ning Lunes, Marso 17, 2025 (PH time), sa National Basketball Association (NBA).
Ang Magic mao ang nagputol sa 16 ka sunodsunod nga kadaugan sa Cavaliers, nga karon pa nakatilaw pagbalik og pilde gikan niadtong Pebrero 4.
Gipangulohan ni Paolo Banchero ang Magic pinaagi sa iyang 24 puntos, nidugang og 22 puntos si Franz Wagner, niamot og 17 puntos si Anthony Black, nihatag og 16 puntos si Wendell Carter Jr. samtang nitunol og 15 puntos si Kentavious Caldwell-Pope.
Ang Magic ningsaka sa 32-37 nga rekord, ikawalo sa Eastern Conference.
Si Donovan Mitchell, kinsa nibalik gikan sa duha ka mga duwa nga pagpalta, maoy nangulo sa Cavaliers pinaagi sa iyang 23 puntos, nihatag og 20 puntos ug 12 rebounds si Jarrett Allen samtang nitampo og 19 puntos si Darius Garland.
Ang Cavaliers, nga ningkombati nga wala ang ilang pambatong forward nga si Evan Mobley, nagpabiling nag-una sa overall bitbit ang 56-11 nga rekord taliwala sa ilang pagkapilde.
Kontrolado pa sa Cavaliers ang kombati sa sayong bahin ug naglabaw sila’g 13 puntos sa halftime, 60-47.
Pagsugod sa 2nd half, hinayhinay nga ninggukod ang Magic hangtod nga naangkon nila ang ilang labing unang labaw, 80-78, sa nahabiling 1:10 minutos sa 3rd quarter ug grabe na kasikit ang panagsangka gikan niadto.
Sa hinapos nga bahin, nasipyat ang Cavaliers sa lima nila ka mga itsa ug nakamugna pa gyud sila og tulo ka turnovers sa nahabiling 27 ka mga segundos.
Gipahimuslan kini sa Magic aron angkunon ang lima ka mga puntos nga daog. / AP