Nasikop ang magkapuyo nga manindahay og isda atol sa buy-bust sa mga sakop sa Philippine Drug Enforcement Agency (PDEA 7) ug sa Talisay City Police Station alas 10:10 sa gabii, Sabado, Hunyo 7, 2025 sa Sitio Rattan, Barangay Tangke sa siyudad sa Talisay.
Ang mga nadakpan mao silang Jojie delos Santos Peros Alyas Ekong, 47, taga Sitio Magay, Barangay Tangke mga maoy target sa operation ug ang iyang kaipon nga si Elvie Badejos Rivera, 50.
Nakuha sa mga operatiba ang duha ka dagkong putos sa gituohang shabu nga dunay gibug-aton nga 100 grams nga gibana-bana’ng mobalor sa P680,000.
Matud ni Leia Alcantara, information officer sa PDEA 7, nga duha ka semana nila gipaubos sa case buildup ang duha ka suspetsado human madawat ang impormasyon gikan sa ilang confidential informant.
Sa dihang nakakuha na silag kasayuran, milusad dayon ug dungan nga operation ang PDEA- Regional Special Enforcement Team, Lapu-Lapu City Office, Talisay City Police Station sa pagpangulo ni Police Lieutenant Colonel Maila Causin Maramag.
Nasayran sa mga otoridad nga makabaligya ang duha og tag 250 ngadto sa 300 ka gramo nga shabu matag semana.
Ang mga nakuha nga ebidensya giduso na sa PDEA Regional Office Laboratory alang sa chemical analysis.
Kasong kalapasan sa Section 5 ug 26(b), Republic Act 9165 ang ipasaka sa PDEA 7 ug Talisay City Police station batok sa mga dinakpan. / AYB