Nasikop ang magkapuyo atol sa buy-bust sa kapulisan sa Dalaguete sa Sityo Guiwaon, Barangay Poblacion, alas 7:45 sa buntag, Lunes, Mayo 27, 2024.
Ang nadakpan mao sila si alyas Raymund ug alyas Negra, kinsa nasakmitan og gidudahang shabu nga motimbang og 12.06 gramos nga gibana-bana nga dunay standard drug price nga P82,008.
Si Raymund, 31, taga Brgy. Carpo, Dalaguete samtang ang iyang kapuyo nga si Negra, hamtong, taga Sityo Ilaya, Brgy. Cawayan sa mao nga lungsod.
Ang buy-bust gihimo sa Dalaguete Municipal Police Drugs Enforcement Unit ubos sa kamandoan sa ilang hepe nga si P/Maj. Kenneth Paul Albotra, pinaagi sa koordinasyon tali sa Philippine Drug Enforcement Agency (PDEA 7).
Ang duha taudtaod na nga gipanid-an sa kapulisan sa Dalaguete gumikan sa ilang pagtinabangay sa pagpayuhot og shabu.
Atol sa operasyon, nakigtransaksyun sila sa police undercover nga nipalit og usa ka plastic nga putos sa shabu bugti sa P500 nga marked money.
Ang mga suspek, sa dihang nadakpan, nakuhaan og tulo ka gamay'ng pakite sa gidudahang shabu ug tulo ka medium size nga pakite sa shabu ug usa ka cell phone nga gigamit sa transaksyon. / DVG