Human sa kapakyasan nilang nasinati sa miaging duha ka mga komperensya sa Philippine Basketball Association (PBA), ang Magnolia Hotshots determinadong makabawi sa season opening sa Governor’s Cup.
Basi sa taho ni Grant Afseth sa Essentially Sports nga napatik sa Spin.ph, gikuha sa Hotshots nga import ang kanhi slam dunk champion sa National Basketball Association (NBA) nga si Glenn Robinson III.
Si Robinson, kinsa naghari sa hinansakay sa NBA niadtong 2017, nakapakita og aksyon sa NBA sulod sa 304 ka mga duwa sa iyang pagbalhinbalhin og duwa sa Minnesota Timberwolves, Philadelphia 76ers, Indiana Pacers, Detriot Pistons, Sacramento Kings ug Golden State Warriors.
Nag-average siya og 5.9 puntos ug 2.6 ka rebounds.
Katapusang nagduwa si Robinson sa Wisconsin Herd sa G League.
Si Robinson, 30, kinsa anak ni NBA champion ug two-time All-Star Glenn Robinson, adunay gitas-on nga 6’6’.
Matod ni Asfeth nga ang upat ka mga buwan nga kontrata ni Robinson adunay NBA opt-out nga magtugot kaniya nga mobiya kon adunay team sa NBA nga gusto’ng mokuha kaniya. / ESL