“Hangtod makaya pa sa lawas, magpadayon ko sa akong panaad.”
Kini ang pulong sa 64 anyos nga si Gilbert Bargayo nga nahinabi sa Superbalita Cebu sa Dominggo, Marso 3, 2024, nga magpalansang na usab sa krus sa ika-29 nga higayon sa Biyernes Santo, Marso 29, 2024.
Bisan senior citizen na ug nag-inusara sa kinabuhi, mapasalamaton nga gihatagan og grasya sa kalig-on sa panglawas.
Ning tuiga, si Bargayo adto siya magpalansang sa Barangay Poblacion II, dakbayan sa Carcar tungod sa pag-akumodar ni Brgy. Kapitan Anong Cabigas.
Matod ni Bargayo, si Cabigas nipasalig nga mohatag og pwersa alang sa crowd control ug pagmintinar sa kahusay ug kalinaw.
“Wala ni sponsor. Dunay mitabang lang..” matod ni Bargayo.
Dugang niya, si Mayor Patrick Barcenas mohatag og tabang sa pagbutang sa entablado ug standby nga emergency personnel atol sa paglansang.
Sa Biyernes Santo 2023, si Bargayo nagpalansang sa Barangay Liburon, Carcar.
Si Bargayo, lumad nga taga Carcar, nagkanayon sa mga hinabang nga pinansiyal iyang gitabang sa usa ka kapilya subay sa iyang panaad. / RRM