Giklaro ni kanhi world champion Filipino Mark Magsayo nga komportable siya sa bag-ong timbang nga iyang awayan, ang super featherweight division (130 lbs).
“It’s a big difference since I moved up because I feel stronger, faster and more relaxed when I fight at 130,” matod ni Magsayo nga napatik sa www.boxingscene.com.
Niini, nagpanikad si Magsayo sa iyang umaabot nga tahas diin kontrahon niya si Mexican Jorge Mata alang sa inilugay World Boxing Council (WBC) Continental Americas super-featherweight strap sa undercard sa Pacquiao-Barrios card karong Hulyo 19, 2025, sa MGM Grand Garden sa Las Vegas, USA.
Ning puntoha, si Magsayo, kinsa kanhi WBC featherweight champion, nagtimbang na lang og 143 lbs., labaw na lang og 13 lbs. sa weight limit sa super featherweight.
Nagpasabot kini nga dili na kaayo maglisod pagkuha si Magsayo (27-2, 18KOs) sa weight limit dili sama kaniadto dihang nagkampanya pa siya sa featherweight division (126 lbs.). / ESL