Parehong nagpanikad sila si Filipino Mark Magsayo ug Mexican Jorge Mata sa ilang panagsangka sa underccard sa gikahinamang Pacquiao-Barrios boxing card karong Hulyo 20, 2025 (PH time) sa MGM Grand Garden Arena sa Las Vegas, USA.
Ang duha ka mga boksidor parehong ningsaad og saktong binukbokay nga seuradong makahatag og saktong lingaw sa boxing fans.
Si Magsayo nipadayag nga mas naengganyo siya sa pagpakig-away gumikan kay mopakita siya og aksyon sa undercard sa away iyang giidolong kababayan nga si kanhi 8-division world champion Manny Pacquiao.
Matod ni Magsayo, kinsa kanhi World Boxing Council (WBC) featherweight champion, nga grabe ang iyang paningkamot alang ning awaya, nga usa sa iyang mga agianan alang sa iyang tinguha nga mahimong two-division world champion.
Magsangka sila si Magsayo ug Mata sa 10-round super featherweight non-title fight.
Si Magsayo, kinsa kanhi sakop sa nabungkag nga ALA boxing stable sa Sugbo, naggunit og 27-2, 18 KOs nga rekord samtang si Mata adunay 21-2-2, 13 KOs nga baraha. / ESL