NAGKANAYON si Filipino Mark Masagyo nga grabe ang iyang kahinam kabahin sa umaabot niyang away sa undercard sa Manny Pacquiao-Marrio Barrios boxing card karong Hulyo 20, 2025 (PH time) sa Las Vegas, USA.
Iya kining gihulagway nga katumanan sa iyang pangandoy.
Ning maong tahas, si Magsayo (27-2, 18KOs) makigbinukbokay ni Mexican Mata Cuellar (21-2-2, 13KOs).
“When I knew that Pacquiao was coming back, I wanted to be on that undercard and my wish has come true. I’m so excited to get into the ring,” matod ni Magsayo nga napatik sa www.boxingscene.com.
Gisaad ni Magsayo nga buhaton niya ang tanan aron makaposte og makapaukyab nga kadaugan.
Si Magsayo, kinsa kanhi World Boxing Council (WBC) featherweight champion, nagkampanya na sa super featherweight division.
“My losses at featherweight were largely because of the weight. I was too dehydrated. I had planned to already move up in weight,” dugang ni Magsayo, kinsa kanhi sakop sa nabungkag nga ALA boxing stable sa Sugbo.
Nagkanayon si Magsayo nga ning puntoha, andam na siyang moaway pagbalik alang sa world title sa kasamtangan niyang weight division. / ESL