Magsayo moaway og balik, Hunyo 16

Magsayo moaway og balik, Hunyo 16
Magsayo. (File photo)

Mobalik og away si kanhi world champion Filipino Mark Magsayo batok ni Mexican Eduardo Ramirez karong Hunyo 16, 2024 (PH time) sa Las Vegas, Nevada.

Ang away nahilakip sa undercard sa panagharong nila ni Tank Davis batok Frank Martin.

Si Magsayo, kinsa adunay 25-2, 17KOs nga rekord, nanghinaot nga mahatagan siya og laing oportunidad nga makaaway pagbalik og world title kon modaug siya batok ni Ramirez, kinsa adunay 28-3-3, 13KOs nga rekord.

Ang kanhi sakop sa nabungkag nga ALA stable sa Sugbo ug lumad nga taga Tagbilaran City, Bohol nahimong World Boxing Council (WBC) featherweight champion pinaagi sa surpresang majority decision nga kadaugan batok kang American Gary Allen Russel niadtong Enero 22, 2022.

Apan sa labing una pa lang niyang pagdepensa, napilde si Magsayo pinaagi sa split decision niadtong Hulyo 9, 2022.

Human niini, napilde na sab si Magsayo batok ni American Brandon Figueroa pinaagi sa unanimous decision niadtong Marso 4, 2029 sa ilang WBC interim featherweight title bout.

Nibawi si Magsayo gikan sa duha ka sunodsunod nga kapildihan pinaagi sa pagrehistro og makapaukyab nga 3rd round knockout nga kadaugan batok ni Isaac Avelar niadtong Disyembre 29, 2023.

Mao kini ang katapusang away ni Magsayo, kinsa nagbasi na karon sa United States.

Ang nagdumala ni Magsayo nga si Sean Gibbons nagkana­yon nga posibleng makaaway si Magsayo alang sa World Boxing Association (WBA) title sa sunod niyang tahas kon modaug siya batok ni Ramirez. / ESL

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph