Usa ka giingon nga fixer sa law office napusasan human nasakpan nga padulong na unta mosuyop og shabu sulod sa pansayan sa ground floor sa Executive Building sa Cebu City Hall sa dalan MC Briones, Barangay Sto. Niño, alas 11:50 sa buntag sa Martes, Disyembre 19, 2023.
Nasikop sa guwardiya ang suspek nga si Jay Arvin Boniel Quimson, 38, minyo , taga Sitio Sili, Brgy. Paknaan, dakbayan sa Mandaue.
Nakuha sa iyang posisyon ang usa ka pakite sa shabu, improvised glass tooter, ug lighter.
Si Quimson dili kawani sa City Hall apan giingon nga nagtrabaho isip fixer sa usa sa mga legal office nga naa sa usa ka edipisyo duol sa city hall.
Nahinabi siya sa Superbalita Cebu samtang siya naa sa sulod sa selda sa Huwebes sa buntag, Disyembre 21, diin iyang giangkon ang salaod.
Siya nibutyag nga sayo sa buntag siya magsuyop og shabu sa maong dapit sanglit dali ra siya makasulod sa city hall nga dili sitahon sa mga guwardiya.
Matod niini nga duha ka pakiti ang iyang gipalit, ang usa iyang gisulod daan sa improvised tooter aron pagsulod niya sa pansayan sa city hall diretso na siyang mosuyop.
Sumala pa niini nga mosubra sa napulo ka higayon siya’ng nisuyop og shabu sulod sa pansayan city hall.
Apan niadtong higayuna, gidemalas siya kay nabantayan sa mga gwardiya human nagduda sa iyang lihok.
“Nindot suyopan gud sa (Cebu City Hall) walay tugaw, walay samok,” dugang ni Quimson.
Naandan na niya nga kada-buntag maoy iyang isuyop sa drugas apan karon, dako ang iyang pagmahay kay Pasko na unta, naa na siya sa bilanggoan.
Gipasabot niya nga dunay mga gwardiya nga nakabantay kaniya hinungdan nga siya gimonitor hangtod nadakpan.
Human siya masignit sa guwardiya, siya gi-turnover sa Waterfront Police Station sa Cebu City Police Office .
Si Quimson gipasakaan og tukmang kaso sa kapulisan nunot sa paghupot og gidiling drugas.