Magtiayon nangamatay ug angol ang ilang anak nga babaye human sila gipamusil sa ilang silingan nga nasuko kanila sa Sityo Rattan, Barangay Sacsac, lungsod sa Pinamungajan, Sugbo alas 11 sa gabii sa Martes, Pebrero 6, 2024.
Ang usa sa mga suspek giingong nasuko nga gibadlong kay banha samtang nag-inom.
Ang magtiayong nangamatay mao sila si Artemio Hernani Traya, 48, ug Sarlina Getong Traya, 47, mga lumolupyo sa dapit.
Ang naangol mao ang ilang anak nga si Chyra Esguera Traya, 22, human maigo sa tiyan.
Ang iyang kapuyo nga si Charlie Diacamus Candelasa, 25, wa naunsa.
Ang mga suspek giila nga sila si Arnold Villamor Ignario, hamtong, ug Arnie Baron Ignario.
Sa pasiunang kasayuran sa Superbalita Cebu gikan sa kapulisan sa Pinamungajan nga gipangulohan sa ilang hepe nga si Police Maj. Gilfred Baroman, si Artemio nakig-inom sa duha ka mga suspek.
Gibuyag ni Chyra ug Candelasa nga banha na sila ug makadisturbo sa mga silingan.
Si Ignario nasuko, nibunot kini og armas ug gipusil si Candelasa apan wa naigo kay nakadagan.
Sunod nga gipusil si Chyra, kinsa naigo sa tiyan.
Gisunod og pusil sa tiyan si Sarlina samtang naigo usab sa dughan sa pagpamusil si Artemio.
Ang mga biktima gidali sa sa pagdala sa Pinamungajan District Hospital apan ang magtiayon gideklarar nga dead on arrival (DOA).
Sa laing bahin, usa ka drayber sa tricycle gipusil-patay sa Sityo Kilawan, Brgy. Tanke, siyudad sa Talisay, alas 2:40 sa kaadlawon sa Miyerkules, Pebrero 7, 2024.
Ang biktima giila nga si Jason Dejacto, hamtong, ulitawo,taga Sitio Sambagan, Brgy. Tanke.
Sa imbestigasyon sa kapulisan sa Talisay pinaagi sa direktiba sa ilang hepe nga si Police Lt. Col. Wayne Magbanua, wala pa mailhi ang mamumuno.