ANAA sa talandugon nga kahimtang ang managtiayon human gitulis ug gitigbas sa tulo ka batan-on alas 3:00 sa kaadlawon, Miyerkules, Hulyo 2, 2025, sa Sitio Bangag, Barangay Saavedra, Lungsod sa Moalboal.
Si Ronie Bongcawel Bontigao, 56, minyo uban sa asawa nga si Antonia Cabag Bontigao, 54, naa sa tambalanan sa Dakbayan sa Sugbo human makaangkon og daghang samad tinigbasan sa ilang nawong, ulo, baba, ug kalawasan.
Unang nadakpan sa kapulisan sa hot pursuit si Christian Buquia Yosores, hingkod ang panuigon, ulitawo, taga Barangay Poblacion, Lungsod sa Alcantara.
Sa imbestigasyon sa Moalboal Police Station, Martes sa alas 11:30 sa gabii sa Hulyo 1, ang mga biktima nangatulog na sulod sa ilang panimalay.
Si Antonia nakamata ug nakabantay nga dunay nisaka sa kisame sa ilang panimalay.
Gisugat sa biktima ang suspek nga daling nigawas sa ilang panimalay apan mga ala 1:00 sa kaadlawon sa Miyerkules Hulyo 2, nibalik.
Gipatiran ang pultahan sa ilang panimalay ug gipugos sa pag-abli. Human maabli ug nakasulod na, gitigbas ang bana nga si Ronie gamit ang sundang nga naigo sa ulo, liog, ug ubang parte sa kalawasan.
Si Antonia nga nakakita nidagan sa gawas sa ilang panimalay apan gigukod sa mga suspek ug gitigbas ang ulo sa makadaghang higayon.
Bisan kon samaran ang asawa nakapangayo pa siya og panabang sa mga silingan ug kabanay.
Nanagan sa ang mga suspek palayo sa nahisgutang lugar.
Nasayran sa kapulisan nga sa wala pa nahitabo ang insidente, gipakaon ug gipainom sa mga biktima niadtong Martes sa gabii ang mga suspek kay ilang bisita atol sa ika-90th birthday sa ilang apuhan. Tungod kay conscious pa man ang mga biktima nga nadala sa Vicente Sotto Medical Center, nakasulti kini sa pangalan sa mga suspek ug unang nadakpan Si Christian Yosores.
Nailhan ug nadakpan ang duha ka kauban nga sila si Juvil Cravantes Sabanal, 18, ug Jimman Carba Lozano, 20, pulos taga Barangay Saavedra.
Nasayran sa kapulisan nga dunay P2,000 sa pitaka ni Antonia samtang P3,000 sab sa bana ang nawala.
Duna say P7,000 sa sulod sa u-box sa ilang motorsiklo ang nawala. / GPL