Magtiayon gitulis sa ‘anting-antingan’

Magtiayon gitulis sa ‘anting-antingan’
SunStar Local News GPX

Lalaking wanted sa pipila ka mga kaso nga kanunay makaipsot sa mga operasyon sa kapulisan, nanulis, apan nanghagit una og pinusilay sa magtiayong biktima.

Wa siyay lain nga gidala sa pagpanulis, ang lisensyado lang nga mga armas sa magtiayon nga Miraluna Labrador Mcintyre, 42, ug Malcolm John Mcintyre, 59, Australian national.

Matod sa Argao Police Station, ang magtiayon nga Mcintyre padung na maniudto mga alas 12 sa udto sa sulod sa ilang balay sa Brgy. Lengigon, bukiran sa lungsod sa Argao, habagatang Sugbo.

Sa kalit lang, niabot ang suspek nga nagmotorsiklo nga giila nga si Roel Gomez, mga 30 anyos kapin ang edad, ilang silingan.

Ingon sa nasayod kini nga duna silay mga armas kay sa pagsulod, nangita dayon kini og mga armas ug nanghagit og pinusilay.

Sa ilang kahadlok, gitugyan sa magtiayon ang ilang kalibre .45 nga pistola ug lain nga 9mm pistol.

Human nakuha ang mga pusil, dali kini nga nisibat sakay balik sa iyang motorsiklo.

Ang magtiayon mga alas 3 na sa hapon sa samang adlaw nakataho sa kapulisan sa pagpanulis.

Nipahigayon og hot pursuit ang kapulisan ubos sa kamandoan sa ilang hepe nga si Police Major Ivy Martin Bartolome.

Sa pagsuwat ning taho wa pay kalambuan sa operasyon sa kapulisan.

Si Gomez dunay duha ka mga kaso nga murder, usa ka attempted murder, usa ka kaso nga illegal drugs ug illegal discharge of firearm.

Niadtong 2014, si Gomez maoy suspek sa pagtigbas patay sa usa ka babaye sa Brgy. Lengigon nga nisaksi sa giingong pagpangawat niya.

Siya usab ang suspek sa pagpusil sa usa ka tinun-an nga taga Argao, apan sa Bgry. Ermita, dakbayan sa Sugbo nahitabo niadtong 2014 gihapon.

Gisuwayan usab siya og patay sa upat ka mga tawo sa samang tuig, apan naluwas sa kapulisan human siya dad-a sa ospital tungod sa iyang samad.

Daghan nang mga operasyon ang kapulisan nga gilusad sa pagdakop kaniya apan kanunay makaeskapo ug makatago.

Sama sa nahimo na siyang legend sa kabukiran sa Argao human siya gidungog nga antingan kay kalit lang mahanaw kon mangabot ang kapulisan.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph