Patay nang nadangat sa pribadong tambalanan ang 34 anyos nga lalaki samtang naangol ang iyang asawa human daruha sa Isuzu elf nga nagkarga og hollow blocks ang ilang gisakyan nga motorsiklo alas 8:40 sa buntag, Sabado, Hunyo 14, 2025 sa dalan Miñoza, Barangay Bacayan, Dakbayan sa Sugbo atbang sa Villa del Rio subdivision.
Ang biktima nga nakalas giila nga si Johnrey Apas Pasaol, 34, taga Cabangahan, Lungsod sa Consolacion samtang naa usab sa Cebu City Medical Center ang asawa niini nga si Rodelyn Pasaol, 32.
Sa imbestigasyon sa Traffic Enforcement Unit sa Cebu City Police Office (CCPO), base sa kuha sa CCV sa dapit, nagsubay sa Miñoza Street sa Bacayan ang motorsiklo nga giluwanan sa mga biktima ug nagsunod usab ang Isuzu elf nga dunay plate number YFT 852 nga gimaneho ni Mariano Sollano Reponte, 59, byudo nga taga Barangay Kimba sa Dakbayan sa Talisay.
Igo nga nakaagi sa usa ka gasoline station gidumbol sa elf ang motor sa mga biktima nga niresulta sa ilang pagkatumba ug wala pa mohunong ang truck hangtod nga nalatayan ang driver sa motor ug napasok sa ilawom.
Dali nga gidala ang biktima sa North General Hospital apan tungod sa dakong kadaot sa lawas ug ulo niini gideklarar siya ni Doctor Emmanuel F. Zañas nga dead on arrival samtang ang asawa gidala sa Cebu City Medical Center.
Gikan sa Barangay Pulangbato sa Dakbayan sa Sugbo ang Isuzu elf nga puno sa karga nga hollow blocks padung sa isla sa Olango sa Siyudad sa Lapu-Lapu.
Sigun pa sa drayber sa trak nga kalit lang nga nipalyar ang brake hinungdan nga mitipas unta siya sa pagpadagan aron nga ibangga ngadto sa gutter aron nga mohunong, apan naabtan ang mga nagmotorsiklo nga diha sa iyang atubangan hinungdan nga nilahos ang sakyanan ug nabagnos ang mga biktima.
Pangatarungan ni Reponte nga paggikan niya sa Barangay Pulangbato maayo pa ang trak de karga apan sa dihang naabot Villa del Rio wa na mopaak ang brake.
Tungod sa maong insidente gibalhog sa TEU ang driver sa elf nga si Reponte ug mag atubang kinig kasong reckless imprudence resulting in homicide, physical injury, ug damage to property.