Magtiayon nanuyop sud drug den, sikop

NAABTAN: Pwerti’ng panabon sa ilang dagway, ang bana (naka-itom t-shirt, pantalaon) ug asawa niini (stripe blouse) sa dihang naatlan nga gironda sa PDEA ug kapulisan ang drug den sa Barangay Suba, Cebu City diin sila nanu­yop og shabu.
NAABTAN: Pwerti’ng panabon sa ilang dagway, ang bana (naka-itom t-shirt, pantalaon) ug asawa niini (stripe blouse) sa dihang naatlan nga gironda sa PDEA ug kapulisan ang drug den sa Barangay Suba, Cebu City diin sila nanu­yop og shabu. HULAGWAY GIKAN SA PDEA-7

Way suwerte ang magtiayon sa dihang pulos sila gipangdakop nga naatlan nga nanuyop sud sa drug den nga gironda sa mga sakop sa Philippine Drug Enforcement Agency (PDEA) 7 inabagan sa Sawang Calero Police Station.

Ang maong suyopanan nahimutang sa Barrio Wakwak, Barangay Suba, dakbayan sa Sugbo nga gironda niadtong alas 4:25 sa Miyerkules sa hapon, Mayo 1, 2024.

Nasikop sab ang target sa operation nga maoy nagpadagan sa drug den nga giila nga si Ramelito Lerma, 53, usa ka laborer.

Ang mga magtiayon nga naabtan nga nanuyop gitago sa pangalang Rey, 38, waiter ug Carla, 35, call center agent nga taga-Barangay Apas, dakbayan sa Sugbo.

Wa ibutyag ning pamantalaan ang pangalan sa maong magtiayon aron sa pagpanalipod sa ilang unom ka mga anak nga pulos menor de edad.

Matod pa nga bisyo sa ma­nagtiayon nga kon makakuwarta, magdungan kini og panuyop sud sa drug den.

Nakuha sa mga operatiba ang 17 ka pakete sa gituohang shabu nga adunay gibug-aton nga 36 gramos nga gibanabana ang average market value nga P244,800 lakip na ang buy-bust money, ug mga drug paraphernalia.

Matod ni Leia Alcantara, information officer sa PDEA 7, nadawat nila ang kasayuran sa maong drug den gikan sa usa ka concerned citizen.

Gipaubos dayon nila sa duha ka semana nga case build-up diin ilang nasuta nga makabaligya si Lerma og 30 ngadto sa 50 gramos matag semana.

Si Lerma nakatapos sa community-based drug rehabilitation program (CBDRP) sa Barangay Suba niadtong 2021 apan mibalik sa pagpamalig­ya sa illegal nga drugas ug mi-level up pa kini ngadto sa pagka-drug den maintainer.

Pinaagi sa maong impormasyon, gi-monitor ang lihok ni Lerma.

Gipasabot ni Alcantara nga kon wala pa lang magpadagan og drug den si Lerma mahimo pa unta kini nga mapa-surrender ug ipaubos pagbalik sa CBDRP sa barangay.

Apan kay misaka naman ang iyang level, kinahanglan na gyud siya nga rondahon aron bungkagon ang drug den nga iyang gidumala ug pasakaan og kaso nga walay gitugot nga piyansa.

“Pahimangno nato kadtong naay mga plano nga mo-enter, maghimog ilang mga drug den, dili sila magsalig nga ah okey ra man ang gobyerno kay naa man diay CBDRP. Dili sila quali­fied anang CBDRP, dakpon gyud sila,” matod ni Alcantara.

Ang gipatutokan karon sa PDEA 7 mao ang mga balay suyupanan. Gani giila nila kini nga high impact operations sanglit ang drug den maoy breeding ground sa mga kri­minal. / AYB

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph