Giluglog ang liog sa maguwang sa iyang manghod gamit ang mahait nga kutsilyo sa ilang balay sa compound sa Visayas Command (Viscom), Barangay Apas, dakbayan sa Sugbo sa alas 11:00 sa buntag sa Huwebes, Marso 7, 2024.
Ang biktima giilang si Roberto Astillo, 65, kanhi sundalo ug nagpuyo sa naasoy nga dapit, nakaangkon og grabeng samad sa liog ug dughan.
Ang suspek sa pag-ihaw sa biktima mao ra sab ang iyang manghod nga si Francisco, 59.
Dugang nasayran sa kapulisan nga ang managsuon pulos pa mga ulitawo.
Atol sa kainit sa panag-away sa duha, ang manghod gikataho nga nikuha’g kutsilyo ug dayong ataki sa iyang maguwang nga niresulta sa kamatayon sa naulahi.
Matod ni Police Major Romeo Caacoy Jr., hepe sa Mabolo Police Station, nga ang hinungdan sa away sa managsuon mao ang panag-ilog sa ilang balay.
Giingong nihulga ang biktima sa iyang manghod nga ilugon ang balay niini ug tungod niini, giunhan sa manghod sa pagdunggab sa dughan ug gigulgol pa ang liog niini.
“Ang iyang alegasyon nga ilugon daw sa iyang igsuon ang iyang balay. Personal kaayo ba. Pulos man ni sila ulitawo mao to iyang gipatay gamit ang kitchen knife,” matod ni Caacoy sa Superbalita Cebu.
Kasamtangan nga gibalhog sa PNP custodial facility ang suspek.
Matod pa, andam siya nga moatubang sa kaso nga ipasaka sa kapulisan batok kaniya.