Naangol ang usa ka 42-anyos nga lalaki human kini gitigbas sa giingong adik nga manghud mga alas 8:00 sa gabii,Mayo 23, sa Purok Center 1, Barangay Naalad, Dakbayan sa Naga.
Ang biktima nailhan nga si Jerome Basalo,dunay live-in partner ug nagpuyo ra sa naasoyng dapit samtang ang suspek mao si Joselito Basalo,32,ulitawo, walay trabaho.
Sa imbestigasyon sa kapulisan nasayran nga samtang naglakaw ang biktima padung pauli sa ilang balay, kalit lang nibutho ang suspek ug sa walay igong rason nanigbas ngadto sa iyang maguwang nga nakaangkon og samad sa wa nga bahin sa iyang kamot.
Niangkon ang suspek nga niadtong higayona nakagamit siya og ilegal nga drugas ug kalit lang nisantop sa iyang huna-huna nga atngan iyang maguwang ug tigbason.
Nasayran usab nga ang duha adunay panagbingkil kaniadto maoy gituohang rason nga gitigbas sa suspek ang biktima.
Anaa na sa luwas nga kahimtang ang biktima samtang ang suspek gitanggong na sa Naga Police Station. / JDG