Ning misyon sa Gilas Pilipinas sa 2025 FIBA Asia Cup, nga ipahigayon karong sa Agusto 5-17, sa Jeddah, Saudi Arabia, wala’y laing nagpilit sa alimpatakan ni coach Tim Cone kon dili ang gold medal.
Apan giklaro ni Cone nga kinahanglan una nilang tutokan ang labing una nilang tahas nga mao ang pagpakigbatok sa Chinese Taipei karong Agusto 6 sa kadlawon, nga alang kaniya mahinungdanon aron makabaton sila og dugang kadasig sa pagkab-ot sa bulawan.
“I’ll say it again, our goal is to win the gold medal. That’s our goal. We’re gonna go out there and try to win the gold medal. Will we? I’m not sure,” matod ni Cone nga napatik sa www.gmanews.tv.
“That’s certainly our goal, but that’s not what we’re focused on though. We’re focused on everyday, on what we do everyday.”
Ning 16-team tournament, ang Gilas nahisakop sa Group D kauban ang Chinese Taipei, New Zealand, ug Iraq.
Sa group stage pa lang, dili na sayon ang sagubangunon nga tahas sa Gilas apan malaumon si Cone sa ilang purohan.
Napilde ang Gilas sa katapusan nilang pagpakigsangka sa Chinese Taipei, 84-91, sa 1st window sa qualifiers niadtong Pebrero. Mao kini ang labing unang higayon nga napilde ang Gilas batok sa Chinese Taipei gikan niadtong 2013.
Ang Chinese Taipei adunay duha ka American-Taiwanese players nga mao ang magsuong sila si Adam ug Robert Hinton, nga parehong nagduwa sa US NCAA Division 1.
“They definitely have the personnel, it wasn’t a fluke that they beat us. So we have to be prepared for them,” dugang ni Cone.
Hinuon kon puwersa ang hisgutan, masaligon si Cone gumikan kay himsog si naturalized player Justin Brownlee unya namalik sab ang mga talento sa bag-ong henerasyon nga sila si AJ Edu, Kevin Quiambao, Carl Tamayo, ug Dwight Ramos.
Gipasabot sab ni Cone nga mas taas ang ilang preparasyon ning higayuna kumpara kaniadto.
“We weren’t complete, that made it difficult, but we had a complete core with Justin and AJ. It was really important to have AJ here,” pasabot ni Cone.
Ang ubang mga sakop sa Gilas mao sila si June Mar Fajardo, CJ Perez, Calvin Oftana, Scottie Thompson, Japeth Aguilar, Jamie Malonzo, ug Chris Newsome. / ESL