Gikuwestiyon sa mga senador ang kredibilidad sa 18 ka “maleta boys” human gikataho nga upat kanila ang nibakwi sa ilang naunang pamahayag labot sa paghatod og mga maleta nga puno sa kuwarta ngadto ni kanhi House Speaker Martin Romualdez ug ubang personalidad.
Wa nganli ni Sen. Panfilo “Ping” Lacson ang maong mga saksi nga nibakwi sa ilang salaysay.
Matod pa sa senador nga ang pagbakwi sa ilang pamahayag nakalubog sa kredibilidad sa maong grupo, ug nakapalibog sa publiko tungod sa pag-usab-usab sa ilang testimonya.
“Sa dami kasi ng flip-flopping o pabago-bagong testimonies nila sa iba’t-ibang venues, hindi na natin alam kung ano ang totoo at kung sino-sino sa kanila ang totoo at hindi,” dugang pa ni Lacson.
Samtang, wala matingala si Sen. Erwin Tulfo sa pag-atras sa pipila ka miyembro sa grupo. Una na nga nisang-at si Tulfo og grave oral defamation batok nila Rosebert Waupan, Bernard Gumban, ug Benny Bulontate sa dihang giapil ang iyang pangalan nga nakadawat sab sa cash deliveries.
Giaprobahan sab sa Department of Justice ang pagsang-at og mga kaso alang sa cyberlibel ug perjury batok sa 18 ka miyembro sa grupo ug abogado nga si Levito Baligod tungod sa ilang hiniusang sinumpaang pamahayag ug mga alegasyon nga gipadayag sa publiko.
Samtang, gisugdan sa Ombudsman ang preliminary investigation batok kang Romualdez kalabot sa giingong mga iregularidad sa mga proyekto sa flood control.
Gimanduan si Romualdez ug ang iyang mga kauban nga respondents nga moduso sa ilang counter-affidavits aron matubag ang mga alegasyon batok kanila. / PNA
