Mall gibangagan; tenant nakawatan og P85K cash

Mall gibangagan; tenant nakawatan og P85K cash
GIBANGAGAN: Gibulit na og balik ang bangag sa likod sa mall sa Dakbayan sa Carcar nga maoy giagian sa mga tulisan./DARIO V. GIL

Tindahan og cellphone sulod sa mall sa Barangay Poblacion, Dakbayan sa Carcar, Sugbo, nawad-an og P85,000 nga kuwarta sa mga tulisan.

Nadiskubrehan sa mga sales staff ang pagpangawat mga alas 7:45 sa buntag sa Sabado, Hunyo 29, 2024, dihang ablihan na unta nila ang tindahan.

Hinuon walay cellular phone nga nakuha sa mga tulisan.

Gisuwayan usab sa mga tulisan ang pag-abli sa vault sa laing nag-abang sa mall, usa ka pawnshop, gamit ang usa ka bara,diin gibutang ang mga alahas apan wala sila molampos ug niungot ang bara sa pultahan sa vault.

Nasuta nga nakasulod ang mga tulisan sa mall pinaagi sa pagguba sa sementadong bungbong sa likod nga bahin sa establisemento.

Tungod sa insidente, napugos usab ang tagdumala sa Gaisano Grand Mall sa pagpasira sa makadiyot alang sa usa ka imbentaryo.Nibalik sila sa operasyon pagka udto.

Ang kapulisan sa Dakbayan sa Carcar, ubos sa pagdumala ni Lieutenant Colonel Bryan O’Niel Salvacion, station commander, kasamtangang nagsusi sa CCTV footage sa maong establisemento aron mailhan ang mga kawatan.

Ang mall di maoy una nga gilungkab ning buwana pinaagi sa pagbangag sa bungbung nga kongkreto.

Usa ka mall sa Dakbayan sa Danao gisulod usab sa mga tulisan pinaagi sa pagbangag sa kongkreto nga bungbong. / DVG

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph