Giangkon ni Brgy. Ginebra Gin Kings coach Tim Cone nga nasagmuyo siya sa desisyon ni Jamie Malonzo nga mobiya sa team aron moduwa sa Kyoto Hannaryz sa Japan B.League.
Giklaro ni Cone nga wala siya nasurpresa niini tungod kay dugay na niyang nasayran ang intensyon ni Malonzo nga moduwa sa Japan B.League.
“We knew a couple of weeks ago,” matod ni Cone kabahin ning maong kalambuan.
Apan giklao ni Cone nga nasayod na siya sa tinguha ni Malonzo duha na ka mga tuig ang nakalabay.
“We’ve known for a couple of years that Jamie had an interest in playing in Japan, so it was not a big surprise,” pasabot ni Cone.
Dili ikalimod nga usa si Malonzo sa mga haligi sa Gin Kings apan gitino ni Cone nga wala’y plano ang management nga mosuway pagpugong sa tinguha niini.
“We’re certainly disappointed Jamie wanted to leave Ginebra,” batbat ni Cone.
“But we’re never going to hold back a player who wants to better his situation. We wish him well.”
Sa pagbiya ni Malonzo, gihagit ni Cone sila si Jeremiah Gray, Aljon Mariano, Jayson David ug uban pa nga mas mokayod aron makatabang sa pagtapak sa haw-ang nga nabiyaan Malonzo alang sa Philippine Basketball Association (PBA) Season 50.
Ang pagbiya ni Malonzo gibutyag mismo sa Kyoto Hannaryz sa social media.
“We are pleased to inform you that we have reached an agreement with Jamie Malonzo for the 2025-26 season,” pamahayag sa Hannaryz.
Si Malonzo maoy labing ulahing Pinoy nga moduwa sa Japan B.League sunod nila ni Dwight Ramos, Kai Sotto, Kiefer Ravena, ug Ray Parks Jr.
Sa kasamtangan, si Malonzo nakatutok sa iyang pagduwa sa Gilas Pilipinas alang sa Fiba Asia Cup karong Agusto 5-17, 2025, sa Jeddah, Saudi Arabia. / ESL