Mama gipusil duol sa haya sa anak, patay

Mama gipusil duol sa haya sa anak, patay

Inahan sa 15 anyos nga batang lalaki nga gipusil patay sa sulod sa usa ka internet cafe sa Sitio Ponce 1, Brgy. Carreta, dakbayan sa Sugbo niadtong Disyembre 13, 2023, gipusil-patay sab alas 2:20 sa kaadlawon sa Lunes, Disyembre 25, 2023, pipila ka metros gikan sa haya sa iyang anak.

Apan ang suspek nadakpan sa manhunt sa kapulisan sa dakbayan sa Sugbo.

Ang biktima giila nga si Crys­tal Mae Labor Ongos, 31.

Sa imbestigasyon sa Mabolo Police Station nasuta nga ang biktima nagpalit lang og ice water sa usa ka tindahan pipila ka metros gikan sa gihayaan sa iyang anak. Nasugatan sa biktima ang suspek nga giila sa mga saksi nga si Joselito Lariba, alyas Insik, 25, taga Sitio Bagong Buhay, Barangay Carreta nga mao usab ang nipusil sa iyang anak nga si Christopher Jose Labor, alyas Wawang.

Nihangyo pa ang biktima sa suspek nga dili siya patyon apan gigukod gyud siya niini nga nagkanayon nga ‘’Ayaw tawon kay naa pa koy mga anak nga gibuhi.”Bisan pa niini, gipusil siya sa makadaghang mga higayon nga niresulta sa iyang hinanali nga kamatayon.

Dali nga nilusad og manhunt ang Mabolo Police Station sa pagpangulo ni Police Major Eraño Regidor uban sa mga personnel sa Special Weapons and Tactics (Swat).

Sa alas 5 sa hapon sa samang adlaw, nakadawat og tawag sa telepono ang Mabolo Police Station labot sa presensya sa usa ka armado’ng tawo sa Sitio Ponce 1 sa Carrera.

Dali nga niresponde ang mga polis ug ilang naabtan ang suspek nga dunay giluklok nga kalibre .38 nga revolver sa hawak. Matod ni Regidor nga ilubong unta sa Disyembre 25, 2023, ang anak sa biktima apan wala mahinayon human nga siya na usab ang gipusil-patay sa killer sa iyang anak.

“Ilubong unta na ang iyang anak karon (Dec 25, 2023) nya kay gipusil man ang inahan, duha sila gihaya sa ilang balay ron,” matod ni Regidor.

Drugas ang usa sa gitan-aw nga motibo sanglit ang suspek nalambigit sa ilegal nga drugas samtang ang anak ni Crystal giingong nakautang og dakong kantidad sa amo sa suspek.

Nabilanggo na usab kaniadto si Crystal sa Cebu City Jail, nagsulod-gawas na tungod sa kaso sa ilegal nga drugas apan naka avail sa plea bargaining.

Giangkon matod pa sa suspek nga ang armas nga nakuha gikan sa iyang posisyon maoy iyang gigamit sa pagpusil sa inahan ug anak. Lakip sa iyang giangkon ang pagpusil sa inahan ug anak tungod kay gibaharan siya nga patyon.

Iyang gipasanginlan si Wawang nga dunay plano nga patyon siya ug gipanabi sa mga silingan nga siya ang tigpayuhot sa ilegal nga drugas sa Carreta hinungdan nga iyang giunhan.

Samtang, ang inahan niini nga si Crystal nibahad, matod pa, nga patyon ang iyang asawa nga mabdos og pipila ka buwan.

“Gitabi man niya nga ako daw ang mangwartahay diha sa Carreta. Kana si Crystal gibaharan man niya ang akong asawa mabdos baya na akong asawa nga iya daw hilabtan kon iyang makit-an,” matod ni Lariba.

Iyang giangkon nga barkada sila ni alyas Wawang apan nausab ang ilang relasyon sa dihang gitug-an siya sa mga silingan nga siya ang tigpayuhot sa ilegal nga drugas.

OPLAN DISIPLINA

Subay sa sunodsunod nga krimen sa Brgy. Carreta, ang Mabolo police station molusad og Oplan disiplina ilabi na sa sulod sa sementeryo diin naa matod pa nagtago ang notadong mga kriminal.

Matod ni Regidor nga ang ilang target ang mga dunay warrant of arrest ug kadtong mga naa sa ilang watch list nga nagpadayon sa ilang ilegal nga trabaho. (Dugang taho ni DVG)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph