HUSTISYA ang gisinggit karon sa pamilya niadtong 27-anyos nga Person with Disability (PWD) nga gipatay sa usa ka hubog nga polis sa Barangay 6, Lungsod sa Tuburan sa alas 6 sa buntag, Biyernes, Hunyo 13, 2025.
Ang inahan ni Leovergel Fin Suico nga si Milagros nibutyag nga ang iyang anak usa ka special child ug walay labot sa tapuk-tapok sa mga batan-on sa ilang barangay nga gikomprontasi ni Police Staff Sergeant Florante Peruchu Hoyle, sakop sa Investigation and Detective Management Unit sa Cebu City Police Office (CCPO).
Matod niya nga atol sa insidente, naa ra sa sulod sa ilang balay si Leo natulog apan sa dihang nakadungog nga dunay buto sa armas napugwat kini ug daw sa gialimungawan dayong bangon.
Apan wala kini magdahom nga mosulod sa ilang balay ang suspek nga pulis ug dayong pusil makaduha ka higayon tumong sa ulo ug tangkugo niini.
"Manawagan ko'g hustisya sa akong anak, wala man toy labot pero yano ra kaayo nga gipatay akong PWD nga anak," matod ni Milagros.
Tinguha sa inahan nga madugta sa bilangguan ang maong polis nga iyang gihulagway nga walay kaluoy nga nihimo niini sa iyang anak.
Naghubag pa sab ang nawong sa igsuon ni Leo nga unang gihapak ni Hoyle sa armas nga niadtong tungora apil sa tapok sa mga batan-on.
Gitakdang ipaubos sa autopsy ang patay nga lawas sa biktima alang sa pagpasaka og kasong murder batok sa suspek.
Ang CCPO nagpaabot nalang sa investigation report gikan sa Tuburan Police Station alang sa pagsugod sa imbestigasyon sa administratiba nga kaso batok sa suspek.
Matod ni Police Lieutenant Colonel Maria Theresa Macatangay, deputy city director for operation sa CCPO, nga nakig-alayon na sila sa hepe sa Tuburan Police Station aron makisayod sa dagan sa ilang imbestigasyon.
Nipasabot si Macatangay nga ang mopasaka sa kasong murder mao ang kapulisan sa Lungsod sa Tuburan, samtang ang sa CCPO ang kasong administratiba.
Gibutyag sa maong police official nga human sa hitabo niadtong Biyernes, giimbargohan na sa iyang service firearm ug tsapa si Hoyle.
Giangkon ni Macatangay nga naa nadestino sa CCPO ang maong suspek apan iyang gipasabot nga wala sila magkulang sa ilang kanunay nga pagpahimangno sa ilang mga sakop nga ang ilang obligasyon mao ang paghatag og seguridad ug pagtuman sa balaod bisan naa sila sa off duty. / AYB, JDG