Mamalitay og manok igtatari gipusil-patay

SunStar Barili
SunStar Barili

Negusyante og manok igtatari namatay diha-diha human gipusil sa duha ka mga lalaki’ng nagmotorsiklo alas 4:40 sa kaadlawon sa Huwebes, Hulyo 4, 2024 sa Brgy. Mantalongon, lungsod sa Barili, bahagatang kasadpang Sugbo.

Ang biktima giila nga si Feliciano Dacuma Digamos, 52, minyo, taga Brgy. Kawasan, lungsod sa Aloguinsan.

Si Police Master Sgt. Gilbert Encabo, imbestigador sa Barili Police Station nga nahinabi sa Superbalita Cebu, nagkanayon nga ang gunman nagsul-ob og black jacket ug black bonnet.

Ang gunman nisakay sa motorsiklo nga itom nga XRM nga nasuta nga nagpaabot kaniya ang drayber.

Matod ni Encabo nga ang biktima, kauban ang iyang asawa, sayo nga nangompra og manok igtatari kay dunay mga suki sa online nga mamalit niini.

Sa dihang nadistansiya ang iyang asawa,ang gunman kalit nga niduol sa biktima ug gipusil sa makadaghang mga higayon.

Ang mga killer ningsibat paingon sa lungsod Aloguinsan.

Matod ni Encabo nga ilegal nga drugas ang ilang unang gitan-aw nga motibo.

Butyag niya nga ang asawa ug anak sa biktima ningtug-an kanila nga piyansado ang biktima sa kasong ilegal nga drugas.

“Nadakpan daw ni siya sa Aloguinsan, drugs kaso,” matod ni Encabo.

Human nakagawas ang biktima sa prisuhan, nagpadayon sa pagpamaligya og manok online.

Gisubay pa sa kapulisan ang mga kopya sa closed circuit television camera (CCTV) sa dapit nga posibleng makatabang sa imbestigasyon. / GPL

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph