Balik prisohan ang usa ka basurera sa dihang nadakpan sa gihimong buy-bust niadtong alas 11:00 sa gabii, Mayo 2, 2025 sa Barangay Labangon, Dakbayan sa Sugbo.
Ang dinakpan nasakpan nga nagpayuhot og ginadiling drugas nga nailhan sa alyas nga Cherry 25, dalaga, ug nagpuyo ra sa naasoyng dapit.
Sa imbestigasyon sa kapulisan, nasikop kining drug suspect atol sa gipahigayon nga anti-illegal drugs operation ug nakuhaan og tulo ka gagmayng pakete ug duha ka medium size sa gituohang shabu ingon man P200 nga buy-bust money.
Gikataho nga ang dinakpan niundang sa pagpamasura ug nibalhin pagpamaligya og shabu kay mas dako iyang makwarta.
Nasayran nga ang maong dalaga nadakpan na usab kaniadto tungod sa kalambigitan sa ilegal nga drugas.
Gibalhug na sa Labangon Police Station ang suspek ug mag-atubang kini og kasong pagpamaligya ingon man paghupot og ginadiling drugas. / JDG