Mga armas ug nagkadaiyang mga gamit sa paggma niini nasakmit sa managlahi nga mga ronda sa kapulisan sa lalawigan sa Sugbo.
Sa Dakbayan sa Danao, nasikop ang usa ka lalaking suspetsadong mamuhatay og mga armas sa ronda sa kapulisan sa Sityo Sapangdako, Brgy. Mantija ala 1 sa kaadlawon sa Marso 26, 2024.
Nagkadaiyang mga armas, parte sa mga pusil ug mga gamit sa pagga niini nasakmit gikan sa suspek nga giila nga si Ronilo Abella Quimbo, 39, ulitawo.
Pinasikad sa search warrant nga giluwatan ni Presiding Judge Ma. Josefa -Ramos sa Branch 90 sa Regional Trial Court (RTC), gironda si Quimbo.
Ang raiding team nga gipangulohan ni P/Lt. Col. Antonio G Ananayo Jr. ubos sa direktiba sa ilang provincial director nga si P/Col. Percival R. Zorilla, nakasakmit sa mosunod: 45 caliber pistol nga adunay magazine; .22 caliber revolver; upat ka lower receiver frame; siyam ka Stella magazine; 13 ka wa pa ma assemble nga bahin sa armas; upat ka assorted metal scale; 20 ka mga assorted metal scale; tulo ka electrical post drill; tulo ka electrical grinder; ug pito ka metal vise.
Ang suspek pasakaan og kasong paglapas sa Republic Act 10591 Comprehensive Firearms and Ammunition Regulation Act.
MAG-UUMA
Samtang nasikop usab si Jhony Celada Torres, 34, minyo, mag-uuma, taga-Purok 3, Brgy. Cantularoy, lungsod sa Sibonga sa ronda sa mga sakop sa Sibonga Intelligence Police nga gipangulohan ni Deputy Chief P/Capt. Elmer Opsima.
Si Torres nalutsan og search warrant nga giluwatan ni Judge Noel Darren C. Damian sa Branch 26 sa Regional Trial Court, Argao. Nakuhaan si Torres og duha ka .38 kalibre nga revolver, tulo ka mga bala niini ug .45 kalibre nga pistola nga may magazine.
Ang suspek mag-atubang og kaso nga ilegal nga paghupot og armas.