Pulos nangapriso ang manag-uyab human sila nakuhaan og gituohang shabu atol sa gipahigayon nga buy-bust sa kapulisan sa Sitio Bato, Barangay Ermita, Dakbayan sa Sugbo kaadlawn sa Hunyo 24, 2025.
Giila ang mga dinakpan sa alyas nga Jose, 60, e-bike driver ug si alyas Gina,43, labandera nga parehong nagpuyo sa naasoy nga barangay.
Subay sa imbestigasyon sa kapulisan sa Carbon, nasakmit gikan sa mga dinakpan ang pipila ka mga pakete sa gituohang shabu nga adunay 10.1 gramos ang gibug-aton nga mobalor og P68,680 ingon man ang P200 nga buy-bust money.
Nangatarungan ang mga dinakpan nga tungod sa ilang pangedaron dili na sila makasugakod sa bug-at nga trabaho hinungdan nga nagkasinabot silang mag-sideline sa pagpamaligya og ilegal nga drugas.
Matod nila nga tungod sa kalisod sa panahon ug aron mapalit ang ilang panginahanglanon, nabuhat nila ang ilegal nga kalihukan.
Ang mga nasakmit nga ebidensya gisumiter na sa PNP Cebu City Forensic Unit alang sa dugang eksaminasyon.
Gitanggong sa Carbon Police Station ang duha ug kasong kalapasan sa Section 5 ug 11, Article II sa RA 9165 ang ilang atubangon. / JDG