Nagkaguliyang sa food park sa Barangay Pitogo, lungsod sa Consolacion, Cebu human gihulagway nga nanglupad ang mga botelya sa ilimnong makahubog ug lingkuranan sa nahitabong lamoklamok sa duha ka managribal nga grupo sa Bloods ug Crips.
Ang maong kagubot nahitabo alas 2:45 sa kaadlawon, Miyerkules, Oktubre 30, 2024.
Usa ang samaran sa pagpamusil human nga naigo sa iyang bukton nga naila nga si Manuel Comoro Jr., 30, taga Cansaga sa maong lungsod.
Sa inisyal nga imbestigasyon sa Consolacion Police nga nagkaabot ang duha ka pundok sa maong dapit nga matod pa nag-inom ug giingong adunay nahitabong panaglalis ug nahitabo ang rambol.
Ang biktima nga si Comoro nga sakop sa Bloods ang giingong nagbarog atbang sa food court ang gipusil sa suspek nga nailhan nga si Ricky Gutib, Crips member, taga Brgy. Nangka, Consolacion.
Atol niining pagsuwat, padayon pa sa ilang hot pursuit ang kapulisan sa Consolacion aron pagsikop ni Gutib ug mga kauban niini. /DVG