Wa magtuo ang managsuon nga unayon ra sila sa ilang gituohan nga higala sa dihang gilugos human silang tanan nangahubog.
Ang maong pagpanglugos nahitabo sa Barangay Cantabaco, dakbayan sa Toledo, kadlawon sa Dominggo, Agusto 11, 2024.
Base sa inisyal nga nahipos nga kasayuran sa Toledo City Police Station ang managsuong biktima nga gitago sa alyas nga Gigi, 19, ug Bella, 22, pulos residente sa Cantabaco, Toledo ang mireklamo nga giamong-amongan sa ilang higala nga ilang gikatagay.
Si Barangay Konsehal Techie Anna Caburnay Paran maoy nangunay sa pagpangayo og police assistance human nga nasayran ang gidangatan sa managsuon.
Ang mga biktima nga si Gigi, graduwato sa senior high school samtang si Bella, tinun-an sa college ang misaysay nga didto sila nagkatapok sa balay sa ilang laing higala diin didto sab ang duha ka mga suspek.
Matod pa ni konsehal Paran nga nagkasabot ang managhigala nga magtagay bisan nga way okasyon nga giselebrar niadtong higayona.
NAHUBOG
Pasado alas 3 sa kaadlawon, Dominggo nanghagad na og pauli si Gigi ngadto sa iyang maguwang apan nagdumili kini sa pagpauli kay magpabilin pa siya.
Tungod niini, miuna sa pag uli si Gigi apan dangtan og usa ka oras nibalik kini aron pag-agni ni Bella nga mopauli.
Sa dihang gipangita sa manghod ang iyang ate, ang suspek alyas Tonying, 28, nga naghigda diha sa sofa ang mibarog dayon bunlot ni Gigi nga iyang gipugos sa pagpasulod sa maong balay.
Pwerting kisikisi sa biktima nga nanglimbasog apan wa magdugay miapas ang uyab ni Gigi nga una niyang gitawgan aron magpakuha.
Napakgang ang dautang tuyo ni Tonying sa dihang miabot ang maong lalaki nga nagpanangpit ni Gigi nga nagusbat na ang sinina.
Padayon nga gipangita ni Gigi ang iyang maguwang sud sa maong balay ug napalgan niya sud sa usa sa mga kuwarta nga naghigda sa kutson samtang ang laing suspek nga gitago sa alyas Rey, 22, ang nagbarog diha sa pultahan.
Gipukaw ni Gigi si Bella aron nga sila mamauli.
GIBUTYAG
Pasado ala 5 sa kaadlawon gibulgar ni Bella ang nahitabo pinaagi sa pagpadala og mensahe sa iyang Facebook messenger.
Saysay pa ni Bella nga nakamatikod nalang siya nga anaa na siya sulod sa kuwarto samtang si Rey nagpatong na niya, apan wa siyay igong kusog sa pagpugong tungod sa kahubog.
Ang mga suspek ang nadakpan ra sab sa maong adlaw sa dihang mirespondi ang mga pulis nga diha ra sa ilang tagsa-tagsa ka mga balay ug malinawon ra sab nga mikuyog ang mga suspek.
Kasong pagpanglugos ang atubangon sa duha ka mga dinakpan. / GPL