WALA makaagwanta sa mga samad tinigbasan nga naangkon ang 18-anyos nga lalaki ug namatay human siya ug iyang mga gagmay nga manghod gipanigbas samtang sila nangatulog.
Ang maong krimen niadtong alas 4:35 sa kaadlawon, Miyerkules, Hulyo 2, 2025, sa Barangay Owak, Lungsod sa Asturias, Sugbo.
Ang namatay nga nadala pa Vicente Sotto Memorial Medical Center (VSMMC), Cebu City giila nga si Kyle Padilla nga adunay mga samad sa abaga ug nawong.
Nagpabilin pa sa tambalanan nga anaa sa kritikal nga kondisyon ang mga manghod ni Kyle nga sila si Gerald Steven, 10, ug Princess Apduhan, 8.
Managlahi ang apelyido sa managsuon tungod kay wala pa makasal ang ilang ginikanan sa dihang natawo si Kyle.
Samtang ni-surrender ngadto sa ilang barangay opisyal ang suspek nga si George Goc-ong Batomalaque, 46, taga Barangay Vito, Lungsod sa Balamban.
Base sa imbestigasyon sa Asturias Police Station nga samtang nangatulog ang mga biktima sa kuwarto sa ilang panimalay, nisulong si Batomalaque ug way daghang istorya, gipanigbas ang mga bata gamit ang sundang nga dunay gitas-on nga 12 pulgadas.
Ang 8-anyos nga nakamata dali nga nibangon bisan samaran sa lawas ug nangayo og pakitabang sa mga silingan.
Nisibat ang suspek samtang ang mga silingan na ang nanawag og mga polis ug sa Asturias Emergency Response Team dayon gidala ang mga biktima sa Balamban Provincial Hospital apan gibalhin sa VSMMC.
MOTIBO
Matod ni Police Senior Master Sergeant Bendie Nuñez, imbestigador sa kapulisan sa Asturias nga pangabubho maoy hinungdan nga gipanigbas sa uyoan ang iyang pag-umangkon ilabi na ngadto sa iyang pag-umangkon nga si Kyle.
Giingong nagduda ang suspek nga adunay relasyon ang iyang asawa ngadto sa 18-anyos nga pag-umangkon.
Ang misis ni Batomalaque igsuon sa inahan sa mga biktima kinsa maoy kasamtangan nga nagbantay sa mga bata kay ang ilang inahan anaa sa VSMMC kay gioperahan uban sa ilang amahan.
Apan nagduda ang mga polis sa pangankon sa suspek ilabi na nga wala siyay lig-ong ebidensiya nga nagpamatuod sa iyang selos.
Gituohan sa kapulisan nga napahimungtan sa suspek sa iyang kasuko ang mga biktima tungod sa bangi niini tali sa amahan sa mga bata.
Si Batomalaque gibalhog sa Asturias Police Station ug mag-atubang og kasong murder ug frustrated murder. / AYB