“Building brands for the world.”
Mao kini ang tumong sa managsuong millennials nga sila si Bryan ug Brandon Liu nga mao na karon ang usa sa nagpadagan sa negosyo sa ilang pamilya, ang kompanya nga GOLDEN ABC.
Ang GABC nga natukod sa Sugbo niadtong 1986 mao ang kompanya nga nagpaluyo sa mga brand susama sa Penshoppe, OXGN, Regatta, ForMe, MEMO, ug BOCU.
Gikan sa pagpangulo sa ilang ginikanan nga sila si Bernie ug Alice Liu nga kasamtangan nga Executive Chairman ug President & CEO sa GABC, mitabang na sab sila si Bryan ug Brandon sa pagpalapad pa sa ilang negosyo.
Si Bryan mao ang kasamtangan nga Vice President for Strategy and Operations sa GABC samtang si Brandon mao ang Vice President sa Penshoppe.
Parehong anaa sa early-mid '30s ang managsuon nga mao ang rason nga dali ra sila nagkasuod dili lang sa ilang responsibilidad sa negosyo apan lakip na sa ilang mga hilig sukad pa niadtong bata pa sila.
“Growing up, we bonded over football, gaming, and sneakers. Despite our busy schedules, we still try to have some gaming sessions gihapon when we can. We’re still gamers at heart. Recently we’ve picked up and been running together,” matod ni Bryan.
Giuyonan sab kini ni Brandon tungod kay silang duha hilig sab og sports ug fitness, “our focus on health is much more profound being that we’re now both dads and both have taken on more senior positions in the company.”
Bata pa si Bryan dihang avid gamer na kini, gani ganahan kini mamahimong professional gamer o makatrabaho sa gaming industry.
Hinuon gipasabot ni Bryan nga wala sila gi-pressure sa ilang ginikanan sa pagsulod sa ilang negosyo, “they always gave us a choice and they always framed it by saying that 'joining the business is a decision'.”
Samtang si Brandon, anaa na ang interes sa negosyo, gani iyang inahan mao ang nakatampo sa iyang hilig sa fashion, “Growing up, fashion was always an interest point for me. When my mom would go on buying trips abroad, she’d always get us the latest and most on-trend pieces.”
Parehong mitungha ang duha sa University of Sydney, si Bryan mao ang nag-Marketing samtang Economics and Finance usab si Brandon.
Isip managsuon nga mahulagway usab nga kauban sa trabaho, mas nahimong dali alang kang Bryan ang pag-atubang nila sa mga hagit sa ilang negosyo.
Gani gibutyag ni Bryan nga dili man sila permi nga mouyon sa usag-usa apan maminaw sila sa unsa ang angay ug ensakto, “We don’t always agree, but we listen and I think that’s what matters. Our relationship as brothers helps us keep each other grounded both in and out of work.”
Karon nga pareho na silang minyo ug anaay mga anak inubanan sa dagko nga responsibilidad sa ilang kompanya, tumong nila nga maila ang Pinoy brands sa laing nasod, susama sa nahitabo sa Ikea nga brand gikan sa nasod sa Sweden.
“I take a lot of pride in being a Filipino and I genuinely believe in the capabilities of the people I’m privileged to work with,” matod ni Bryan.
Mao sab kini ang tumong ni Brandon, “My hope is to keep growing Penshoppe into a brand that stays relevant and meaningful to the next generation—both here in the Philippines and beyond.”
Tambag sa duha sa mga gusto usab magnegosyo ug mahimong malampuson, dili magdali ug kinahanglan nga andam makat-on, mosugod nga gamay, ug motrabaho niini.
“I’d say stay rooted. You don’t have to leave Cebu to dream big. Lead from the front, but remember—it’s not about you, it’s about the people you lead and serve,” tambag ni Brandon.
Ang Penshoppe gikatakda nga magsaulog sa ilang ika-40 ka tuig sa retail business sunod tuig. Gani plano sa GABC nga ipaila ang ilahang brands sa ubang nasod sa Asya, Africa, ug South America.