Managsuon nga nagpangidaron og tres anyos ug usa pa ka tuig nga manghod ang naapil sa pagka sunog sa ilang balay samtang talandugon ang kahimtang sa amahan.
Ang maong insidente nahitabo sa Purok 1, Brgy. Manga, siyudad sa Tagbilaran, Probinsiya sa Bohol, alas 8:20 sa gabii, Miyerkules, Agusto 1, 2024.
Ang magsuong napaig sa pag-ulbo sa kayo mao silang Jessabel Lasco, 3, ug ang usa pa ka tuig nga bata nga lalaki nga si Edgardo Lasco Jr.
Ang kritikal nga amahan mao si Edgardo Sr., 55, sulod sa tambalanan human makaangkon ug mga sunog sa lawas niini.
Matod ni P/Lt. Col. John Kareen Escober ang hepe sa Tagbilaran City police station didto nagsugod ang kayo sa panimalay sa biktima nga ginama lang sa light materials nga gisusi pa sa mga bombero kung unsay hinungdan.
Matod ni Escober nga samtang nangatulog ang magsuon kalit lang nga misilaob ang kayo ug mikatap sa silingan nga balay.
Gisuwayan pa unta pagtabang sa amahan ang duha niya ka mga anak apan tungod sa kainit ,wala na niya kini maluwas.
Dali nga naabot ang mga bombero sa siyudad apan tungod kay ginama sa light materials dali ni nga mikatap ug miugdaw sa tulo ka mga balay.
Nadawat sa kabomberohan ang sunog sa alas 8:10 sa gabii ug pagka alas 8:18 na controlar nila ang kayo ug hingpit nga napawong sa alas 8:30 sa gabii nga dunay danyos nga P25,000.
Nakaangkon og seryuso nga paso sa lawas ang amahan nga si Edgardo Sr. nga gidala sa Governor Celestino Gallares Medical Center nga gihulagway ni Escober nga kritikal ang kahimtang. / AYB