Napalgang naglutaw nga patay na ang usa ka mananagat nga namana sa kadagatan sa Brgy. Lagunde, lungsod sa Oslob, alas 6:00 sa gabii sa Miyerkules, Disyembre 20, 2023.
Giila ang biktima nga si Ramil Magalso, 48, minyo, nagpuyo sa dapit.
Sa imbestigasyon sa kapulisan sa Oslob ubos sa kamandoan ni Police Capt. Ian Macatangay, laing mananagat nga ig-agaw niini nga si Jason Magalso maoy unang nakakita ni Ramil nga naglutawlutaw sa dagat nga way panimuot.
Si Jason dali’ng nanawag og tabang sa ilang mga silingan sa babayon.
Ilang dali nga gidala ngadto sa Oslob District Hospital ang biktima apan gideklarar sa doktor nga nga dead on arrival (DOA).
Dugang nasayran sa kapulisan nga si Ramil nag-inusara lang nga namana nga hubog.
Apan wa pa masayri sa kapulisan ang hinungdan kon nganong nalumos kini human nasayran nga dugay na kining mananagat ug haniti mosalom sa tubig.
