Patay dihadiha ang usa ka mananagat human gipusil tungod kay matod pa wala ka-remit sa halin sa shabu, pasado alas 11:00 gabii, Abril 22, 2025, sa sudlunon nga bahin sa Sitio Sambagan, Barangay Tangke, Dakbayan sa Talisay.
Ang biktima nga nakaangkon og daghang samad-pinusilan sa iyang ulo ug lawas nailhan nga si Redwin Daan, 36, ulitawo ug nagpuyo ra sab sa kasikbit nga sitio sa maong barangay.
Matod ni alyas Rona, manghod sa biktima nga wala na sila masayod asa magtambayan ilang igsuon sanglit talagsa na lang kaayo ni mauli sa ilang balay ug wala sab kini nakahisgot nga duna siyay kontra o kaha nadawat nga hulga sa iyang kinabuhi.
Apan giangkon sab ni Rona nga maggamitan ang biktima og ginadiling drugas.
Subay sa imbestigasyon sa kapulisan sa Talisay, dali silang nirespondi sa maong dapit dihang nakadawat og tawag sa usa ka concern citizen nga nagpahibawo nga dunay patay nga tawo ug sa pag-abot sa mga kapulisan sa nahisgutang dapit, ilang naabtan nga gaubo ang biktima ug naligo na sa kaugalingong dugo.
Base sa nakuhang CCTV footage, nakita ang biktima nga niagi sa maong dapit mga alas 11:00 pasado sa gabii ug pipila lang ka minuto ang nilabay, nadungog ang pipila ka buto sa armas.
Gibutyag ni PLTCOL Maila Causin Maramag, hepe sa Talisay Police Station nga ang motibo sa maong pagpamusil dunay kalabutan sa ilegal nga drugas ug sa pagkakaron duna na silay mga persons of interest pinaagi sa pag-backtracking ug kuha sa CCTV ingon man ang kooperasyon sa mga residente sa barangay.
" Actually we have 3 persons of interest and we already have one of them in custody," asoy ni Maramag.
Nidugang sab si Maramag nga dako kaayo og tabang ang mga CCTV nga na-install sa mga kabalayan tungod kay mas dali nilang nailhan ang mga responsabli sa krimen ug mas mapadali nila og sulbad ang susamang mga hitabo.
Dihang gisusi sa sakop sa Scene of the Crime Operation (Soco) ang dapit sa krimen, nakuha nila ang pito ka empty shells.
Atol ning pagsuwat, ang Talisay police nagpadayon sa pagsubay sa nahimutangan sa laing persons of interest. / JDG