Usa ka mananagat ang gikatahong na-missing sa lawod sa Barangay Talo-ot, lungsod sa Argao, samtang grabeng baha ang nasinati sa habagatan sa lalawigan, labina sa dakbayan sa Toledo sa Sabado, Nobiyembre 18, 2023.
Kini human ang sakayan na lang ang nabangalan nga wala nay tawo ug dunay pukot karga niini sa lawod sa Talo-ot sa Argao, alas 8:00 sa buntag sa naasoy nga adlaw.
Unang nasayran kini sa Superbalita Cebu gikan kang Kenneth Steve Ramirez, taga Barangay Langtad, Argao, bahin sa nakit-ang sakayan nga wala nay sakay ug gibira padulong sa baybayon sa laing mananagat.
Si Mildred Puerto, silingan ni Ramirez, nga nahinabi sa Superbalita Cebu, niingon nga ang iyang bana nga mananagat nga si Albert maoy nakabangal sa sakayan.
Matod ni Mildred, nakita sa iyang bana nga nalunod kini hinungdan nga gisawom sa iyang bana ug gihabwaan og tubig dayong guyod niini sa iyang pumpboat ngadto sa baybayon sa Langtad.
Nasayran nga ang sakayan dili hingpit maunlod sa bawod tungod sa kagaan niini.
Gitaho na kini sa kapulisan apan tanghaga pa atol ning pagsuwat kon kinsa ug asa ang mananagat nga tag-iya o sakay niini.
Nanawagan ang kapulisan sa publiko sa pagsusi sa ilang kabanay nga wala mauli sa pagpanagat ug pag-ila sa sakayan.
BAHA
Usa ang dakbayan sa Toledo sa mga dapit sa lalawigan sa Sugbo nga naapektohan sa grabe pagbaha gumikan sa pagbunok sa uwan sa Sabado tungod sa low pressure area (LPA) sa amihanan sa Visayas ug shear line o panag-abot sa klima nga init ug bugnaw.
Sa pakighinabi sa Superbalita Cebu sa usa mga staff sa Toledo City Emergency Operation Center nga si Cecil Francisco, kini nagkanayon nga ang kusog nga uwan nagsugod pasado alas 10:00 sa buntag.
Matod ni Francisco, ang grabeng baha nasinati dapit sa New Public Market sa Brgy. Poblacion tungod sa pag-awas sa usa ka sapa sa dapit apan way dakong kadaut kini nga nahimo.
Lakip sa nalunopan sa tubig sa baha mao ang Barangay Luray 1, Luray 2, Poblacion, Magsaysay Hills, Sipaway, ug Kalumampaw.
Dason ni Francisco, ang maong mga dapit, mabahaan panahon sa ting-uwan.
Ang ilang rescue team padayon nga nag-monitor tungod sa nagpadayon nga bati nga panahon.
Sumala sa Philippine Atmospheric, Geophysical and Astronomical Services Administration (Pagasa) Visayas, walay bagyo apan niisyo kini og pasidaaan sa publiko nga magbantay tungod sa kusog sa uwan gumikan sa shear line ug dala sa low pressure area.