Patay nang gidagsa sa baybayon sa Brgy. Lo-oc, dakbayan sa Dumaguete, Negros Oriental, alas 3 sa hapon sa Miyerkules, Abril 25, 2024, ang usa ka mananagat nga taga lungsod sa Oslob, habagatang Sugbo nga missing.
Sa follow up sa Superbalita Cebu, si Judith Bentoma, taga Lagunde, Oslob nga maoy ni-post sa Facebook, niila sa missing nga silingan nga mananagat nga si Jessie Lagunay, 48, minyo, taga Brgy. Lagunde, Oslob.
Matod ni Bentoma nga si Lagunay kada alas 3 sa hapon managat ug adto sa payaw sa lawod maghikot sa iyang pump boat.
Siya matulog unya inig sayo sa buntag sa pagkasunod adlaw managat una modunggo ug ang isda kumprahon sa iyang inahan.
Apan matod pa nga niadtong Martes, Abril 23, 2024, alas 3 sa hapon, nipalawod na usab kini apan nahibulong na lang sila nga wa makauli sa Miyerkulis sa buntag nga mao untay naandan.
Sa pagsusi, didto nasuta nga naputol ang pisi nga gihikot sa payaw ug wa na ang pump boat lakip ang biktima hinungdan sa ilang pagduda nga nabanggaan kini og barko.
Matod ni Bentoma, alas 3 sa hapon sa Huwebes, Abril 25, nakabasa sila sa Facebook post ni Bernie Uzarraga David nga taga Lo-oc, Dumaguete City sa hulagway sa biktima nga patay na.
“Basin naay nakaila ani nga taga Isla nidagsa sa Looc, Dumaguete,” sumala sa post ni David.
Mao kini hinungdan nga ilang nahibaw-an ang nahitabo kang Lagunay. Kini giadto ni Dylwin, igsuon sa biktima, ug nakompirmar nga iyang maguwang ang gidagsa.
Si Dylwin nga gikahinabi sa Superbalita Cebu pinaagi sa cellphone nagkanayon nga nagtuo sila nga ang iyang maguwang nadasmagan og barko samtang natulog sa pumpboat.
Matod niya, imposible nga maputol ang pisi nga gihigot sa payaw kay di man dagko ang balod.
Samtang ang pump boat sa iyang maguwang didto na makit-i sa lawod sa lungsod sa Bacong, Negros Oriental nga naunlod na nga wa nay katig.
Timailhan nga kini nadasmagan. Matod ni Dylwin nga ila nang gi-report sa Philippine Coast Guard ang maong hitabo. / DVG