Nasikop sa kapulisan ang usa ka 61-anyos nga mananagat human nadakpan sa buy-bust tungod sa ilegal nga pagbaligya og krudo sa kadagatan sa Barangay Ubay, Lungsod sa Tubigon, Probinsiya sa Bohol.
Ang suspek giila lang sa alyas nga Jose, residente sa Purok 1, Ubay, Tubigon, nadakpan sa hiniusang pwersa sa Bohol Maritime Police ug Provincial Intelligence Unit (PIU) sa Bohol Police Provincial Office (BPPO) niadtong Huwebes sa udto, Agusto 20, 2026.
Nakuha gikan sa suspek ang 14 ka dagkong galon nga puno sa krudo nga nagkantidad og P14,000, lakip na ang usa ka motor banca nga gigamit sa pagbiyahe ug pag-apudapod sa maong petrolyo.
Sumala sa imbestigasyon, nakadawat og impormasyon ang kapulisan bahin sa sideline ni Jose sa pagbaligya og krudo sa dagat nga walay igong permit.
Tungod niini, gipahigayon ang entrapment ug nasikop ang suspek human niya gitunol ang krudo sa nagpakaaron ingnon nga buyer.
Gipriso sa Bohol Police Provincial Office si Jose samtang giandam na ang pormal nga kasong kalapasan sa Batas Pambansa Bilang 33 nga giamendar sa Presidential Decree 1865 (Illegal Trading of Petroleum Products) batok kaniya. / AYB
