Nangiyawat og panagat ang 38-anyos nga si Teodilito Intan bisan nga dautan ang panahon niadtong hapon sa Martes, Agusto 5, 2025, sa kadagatan sa Barangay Punta Engaño, Dakbayan sa Lapu-Lapu.
Si Intan, taga Sityo Solas Kalipayan, Punta Engaño, adunay kapuyo ug walo ka mga anak.
Ang maong padre de pamilya ang pugos nga nanagat niadtong higayona taliwala sa unos sa tuyo nga ang kuha niya nga isda iyang ibaligya aron nga ikapalit og bugas ug magbilin sab alang sa ilang panud-an.
Nasayran nga base sa asoy sa mga nakakita nga nagtuo sila nga walay sakay ang baruto nga nagpautaw-utaw sa dagat nga ilang nagsigpatan.
Sa dihang giduol ang baruto aron unta i-turn over sa barangay sa pagtuo nga gi-anod sa bawod, ug mauli ngadto sa tag-iya.
Apan sa ilang kakurat, napalgan ang lawas ni Teodilito nga nahay-ad sa katig samtang ang iyang ulo natugsaw sa dagat.
Gihulagway sa mga nakakita nga nag-aso pa ang baruto nga adunay lungag sa kilid nga bahin ug gipahibalo ang kapuyo ni Intan nga si Teresita Caay, 35.
Gikataho nga adunay lima ka silingan nga kuyog ang biktima sakay sa ilang tagsa-tagsa ka mga baruto apan si Teodilito nabuwag sa grupo.
Nasayran nga dihang nagpangilat na, giingong gipahimangnuan ang biktima sa iyang mga kauban nga dili lang usa mudunggo ug paabuton lang nga molinaw ang panahon apan giingong nipadayon gihapon kini sa pagbugsay pauli dala ang iyang kuha nga mga isda.
PANUD-AN
Nibutyag si Ma. Mae Intan, 17, kinamagwangang anak sa biktima sa dihang nahinabi sa Superbalita Cebu nga naandan sa iyang amahan nga mogikan sa alas 3 sa hapon aron managat ug mouli sa alas 5 ngadto na sa alas 6 na sa sayong gabii.
Matod pa nga si Intan ra ang nanginabuhi sa ilang pamilya, hinungdan nga maningkamot nga matag adlaw managat.
Ang mga kuha nga isda iya kining ibaligya aron ipalit og bugas samtang magbilin sab alang sa ilang panud-an.
Ang kabanay sa biktima kumbinsido nga naigo kini sa kilat sanglit aduna kini mga paso ug bun-og sa kalawasan hinungdan nga nakadesisyon sila nga dili nalang kini ipaubos sa autopsy bisan pa man sa tambag sa kapulisan.
Samtang si Lapu-Lapu City Mayor Cindi King-Chan dali nga nipadangat sa iyang hinabang og abag ngadto sa pamilya’ng Intan. / Dugang taho ni Denise P. Codis