Nakatala ang Mandaue City Health Office (CHO) og 373 ka dengue cases ug namatyan og usa gikan sa Enero 1 hangtod Hulyo 30, 2026, subay sa Dengue Surveillance Report.
Base sa report nga gikan sa 373 ka mga kaso sa nagkalainlaing reporting units, 96 niini ang laboratory-confirmed, 140 ang giila nga suspected, ug 137 ang probable cases.
Gipadayag ni Assistant City Health Officer Phyllis Bidon nga ang mga kaso sa dengue kasagarang mosaka sa panahon sa ting-uwan, ilabi na sa mga buwan sa Hunyo ug Hulyo.
Iyang giklaro nga ang nalistang mga kaso sa dengue sa maong mga buwan mas ubos kon itandi sa pareho nga panahon niadtong 2025.
“Community effort man gud na siya ang prevention. Wala pata naapil sa top 10, although we have cases,” matod ni Bidon.
Subay sa Dengue Surveillance Report, ang kapin 370 ka mga kaso nga narekord gikan sa Enero hangtod Hulyo nagpakita og 6.8 porsiyento nga pagsaka kon itandi sa pareho nga panahon niadtong 2025.
Apan ang report sa CHO wala nagpakita sa eksaktong ihap sa dugang nga kaso gikan sa maong pagtaas sa kaso.
Una niini, nag-report ang CHO nga ang Mandaue City nakatala og 198 ka dengue cases gikan sa Enero hangtod Hunyo ning tuiga.
Samtang ang case fatality rate nikanaog ngadto sa 3 porsiyento gikan sa 6 porsiyento nga narekord sa katapusan sa 2025 diin tulo ka dengue-related deaths ang nalista gikan sa kinatibuk-ang 520 ka kaso sa dengue.
Gipakita sa data nga 204 ka mga lalaki ang na-dengue, samtang 169 ka kaso ang sa mga babaye.
Ang mga bata nagpabilin nga labing apektadong grupo, diin kadtong nag-edad og usa hangtod 10 ka tuig naglangkob sa 38 porsiyento sa tanang reported infections.
Ang labing bata og edad nga pasyente mao ang usa ka tuig, samtang ang labing hamtong nag-edad og 87 diin ang median age 13-anyos.
Adunay kinatibuk-ang 148 ka kaso ang naglambigit sa mga bata nga ubos sa 10 anyos.
Sa 27 ka barangay, ang Tabok ang nakatala sa labing taas nga ihap sa dengue cases nga naglangkob sa walo ka porsiyento sa kinatibuk-an, gisundan sa Barangay Alang-Alang ug Cabancalan nga parehong nitala og 6.7 porsiyento, ug Barangay Umapad nga adunay 6.2 porsiyento.
Gipasabot ni Bidon nga gi-rank sa CHO ang mga barangay subay sa ihap sa nadokumento nga dengue cases, kon diin nakatala ang mga dapit sa labing taas nga kaso.
Iyang gipadayag nga bisan ang mga barangay nga adunay mas gamay nga populasyon makatala gihapon og taas nga kaso sa dengue, tungod kay ang presensya sa mga lamok ug maayong itlogan niini mao ang mga nag-unang hinungdan sa pagpasa sa sakit. /