Higpitan na sa Mandaue City Hall ang pag-monitor sa attendance ug punctuality sa mga kawani subay sa bag-ong kamanduan ni Mayor Thadeo “Jonkie” Ouano nga nagtumong sa pagpalambo sa disiplina ug accountability sa public service.
Sa usa ka memorandum nga pinetsahan Hulyo 1, 2025, gimanduan ni Mayor Ouano ang tanang department head nga hugot nga ipatuman ang opisyal nga oras sa pagtrabaho ug siguroon nga ang adlaw-adlaw nga attendance sa tanang kawani maayo ang pagka-record ug isumite sa Human Resources and Management Office (HRMO) .
Kining polisiya alang sa tanang kawani sa gobiyerno sa siyudad, apil na ang mga regular, job order , ug kadtong ubos sa contracts of service, bisan pa man kung asa sila nadestino sa City Hall o sa mga opisina sa barangay.
Gikutlo sa mayor ang Seksyon 4 sa Republic Act 6713 o ang Code of Conduct and Ethical Standards for Public Officials and Employees, nga naglatid sa mga prinsipyo sa interes sa publiko, pagkamatarong, pagkasinsero, ug propesyonalismo sa serbisyo sa gobyerno.
Gimanduan usab ang mga empleyado nga magsul-ob sa ilang identification (ID) cards sa tanang oras samtang nagduty.
Kini nga lakang nagtumong sa pagsiguro nga ang mga kawani dali nga mailhan sa publiko panahon sa opisyal nga transaksyon sa City Hall.
“This way, residents who have official transactions at City Hall will know who they are dealing with, and employees are also reminded to act professionally,” dugang sa mayor.
Di pa hinuon tanang empleyado nakadawat sa ilang mga ID, tungod kay nagsugod pa lang ang pag-imprenta sa bag-ong mga ID card .
Gipasabot ni Ouano nga ang pagkalangan tungod sa nagpadayon nga transisyon ug revalidation sa kinatibibuk-ang gidaghanon sa mga empleyado, lakip na ang bag-ong mga transfer ug bag-ong mga na-hire.
Ang tanang di motuman sa kamanduan,mag-atubang og
tukmang silot.
This is part of our effort to uphold integrity and efficiency in public service,” dugang ni Ouano .
Matod niya, iapod-apod ang mga ID pinaagi sa mga departamento kung ma-finalized na nila ang updated nga listahan sa empleyado. / CAV