Andam nga makig-dialog ang Mandaue City Government ngadto sa Cebu Provincial Government aron dawaton sa probinsya ang 397 ka sakong bugas nga wa mabaligya gikan sa programang Sugbo Merkado Barato (SMB) aron masulbad na ang problema.
Bisan pa man nga wala pay pormal nga proposal, si City Administrator Sally Malig-on niingon niadtong Huwebes, Agusto 14, 2025, nga mao kini ang tuyo ni Mayor Thadeo “Jonkie” Ouano.
Siya nipaambit nga padayon pa ang diskusyon sa sabot-sabot apan wa na siya mohatag og dugang detalyi.
Dugang ni Malig-on, adunay informal nga hisgot-hisgot sa probinsya apan sa pagkakaron, ang mga wala mabaligya nga bugas gitipigan pa sa Barangay Tawason.
Matod niya nga kung dili dawaton sa probinsya ang bugas, ang siyudad mangita og laing paagi sa pag-dispose niini.
Si Ouano sa una nipahibawo nga plano niyang iuli ang bugas tungod kay way pormal nga kasabutan bahin sa suplay.
Apan gibalibaran kini sa kapitolyo tungod kay di na makonsumo ang bugas ug nga ang Mandaue nagkasabot nga maoy mag-atiman sa pag-dispose niini.
Si Provincial Assistant Administrator Aldwin Empaces nitumbok nga di na maayo ang kondisyon sa mga bugas ug duna nay nasabutan ang duha ka habig.
Usa ka joint inspection sa City Agriculture and Health Offices niadtong Agusto 4 ang nagpakita og mga timailhan sa kontaminasyon sa pipila ka naablihan nga sako.
Ang mga sample gikan sa wala maablihi nga mga sako gipadala sa Department of Agriculture Central Visayas para sa testing.
Human sa resulta, gimanduan ni Ouano ang dinalian nga paghunong sa pagbaligya ug distribusyon sa bugas alang sa kaluwasan sa tanan.
Ang maong bugas kabahin sa SMB program nga gilusad niadtong 2023 ubos sa pagduma ni kanhi Gobernador Gwendolyn Garcia, nga nagtinguha sa pagtanyag og barato nga bugas ug basic goods para sa mga pamilya nga ubos ang kita.
Si Michael Pielago, pangulo sa City Social Welfare Services Office, niingon nga naningkamot gyud ang siyudad nga mabaligya ang bugas sa dihang nagsugod ang distribusyon niadtong Enero 2024.
Apan hinay ang baligya tungod sa daghang bukbok, limitado nga purchase limit, ug kalisod sa pag-abot sa mga residente sa lagyo nga mga lugar.
Niadtong Enero 2025, gipahibalo sa probinsya ang siyudad nga sila ang financially responsible sa mga wala mabaligya nga bugas, usa ka obligasyon nga giingon ni Pielago nga wala kini nahibaw-an sa una.
Ilang gisugyot nga iuli ang bugas o ipataas ang purchase limit aron mapaspasan ang baligya, apan pareho kining gibalibaran sa Kapitolyo.
Gihatagan og gibug-aton ni Malig-on nga bukas ang siyudad sa dialogue ug naglaom nga makab-ot ang usa ka patas ug makatabang nga solusyon. / CAV