Hapit na mahingpit ang pagpangandam sa Dakbayan sa Mandaue alang sa May 12 national and local elections nunot sa malampusong pagpangabot sa 271 ka Automated Counting Machines (ACMs) ug ubang importanteng mga election paraphernalia.
Ang Commission on Elections (Comelec) Mandaue, pinaagi ni Election Officer II Jackielyn Reuyan, maoy nangulo coordination ug supervision sa mga logistic aron maseguro ang kahapsay, transparent, ug epektibong electoral process alang sa tanang mga botante sa dakbayan.
Ang delivery mo-cover sa 29 ka polling centers sa tibuok Mandaue City.
Gawas sa ACMs, ang Comelec niapudapod sab sa mga election paraphernalia nga naglakip sa forms, markers, secrecy folders, ug ubang importanting gamit sa pagbutar gawas lang sa official ballots nga dili dungan mangabot.
Agi og pagpangandam sa posibleng mapalpak nga mga makina atol sa adlaw sa eleksyon, ang Comelec dunay gigahin nga 38 contingency machines nga i-standby.
Kining mga backup ACMs gibutang sa Mandaue City Sports Complex ug ipanghatod dayon ang mga makina kon dunay mga presinto nga magkaproblema.
Sa pakigtambayayong sa kapulisan, upat ka uniformed officers ang idestino sa matag polling precinct.
Kining mga polis maoy mobantay sa mga election materials lakip na sa ACMs ug ballot boxes gikan sa paghatod hangtod sa pagtapos sa botasyon.
Ang ilang presensya gitumong sa pagpatigbabaw sa kaligdong ug kaluwas sa eleksyon.
“The official ballots will be delivered directly to the polling precincts on the morning of May 12 under strict security protocols,” matod ni Reuyan. / CAV