Usa ka rekomendasyon sa City Joint Security Control Council (CJSCC) ngadto sa Commission on Elections (Comelec) nga ipaubos ang Dakbayan sa Mandaue ug mga Lungsod sa Daanbantayan, Dalaguete, ug Argao tungod sa tensiyon sa pulitika.
Ug giila sa Comelec ang rekomendasyon sa CJSCC ug gi-refer kini ngadto sa Regional Joint Security Control Center (RJSCC) alang sa dugang pagsusi.
Matod ni Comelec Region 7 Director Francisco Pobe, sutaon sa rehiyonal nga buhatan ang rekomendasyon atol sa gikatakdang tigom niini karong Abril 28 aron masuta kung tinuod ba nga naggarantiya sa yellow category classification ang mga lugar.
Lakip sa girekomendar nga ipaubos sa yellow category mao ang Lungsod sa San Miguel sa Bohol.
Sa suwat nga gitumong ngadto kang Police Brigadier General Redrico Atienza Maranan, director sa Police Regional Office PRO) 7, ang Comelec nitumbok sa panginahanglan sa pagpausbaw sa kaandam sa operasyon ug pagsiguro sa malinawon nga proseso sa eleksyon.
Ang sulat nag-ingon nga ang pagbutang niini nga mga lugar ubos sa yellow nga kategorya magtugot alang sa mas estrikto nga mga lakang sa seguridad ug dugang nga pag-monitor aron mapugngan ang potensyal nga kapintasan nga may kalabutan sa eleksyon.
Hinuon, giklaro ni Pobe nga ang final classification magdepende sa collective decision sa RJSCC.
Ang yellow nga kategorya nagsilbi nga alert level para sa mga lugar nga adunay kasaysayan sa politikanhong kagubot, grabe nga panag-away, o natala nga mga insidente nga may kalabutan sa eleksyon.
Gitugotan niini ang mga pwersang pangseguridad sa pagpatuman sa mga precautionary measures, lakip ang dugang nga visibility ug checkpoints, aron mapanalipdan ang proseso sa eleksyon.
Ang RJSCC, nga gilangkuban sa Comelec, PNP, ug Armed Forces of the Philippines (AFP), maoy modesisyon sa final list sa Election Areas of Concern (EACs) human sa makuti nga pagrepaso sa intelligence ug field reports.
Ang Comelec nipatuman sa color-coding scheme sa pag-ila sa election hotspots diin ang green o berde maliawaon, yellow usa ka areas of concern, orange alang sa areas of immediate concern, ug red o pula sa areas of grave concern. / CAV