Nagsugod na ang Dakbayan sa Mandaue sa pagpanawat og aplikasyon alang sa ilang College Scholarship Grant gikan sa Marso 17 hangtod 31, 2025, nga magtanyag og financial assistance ngadto sa mga deserving nga mga tinun-an sa School Year 2025-2026.
Si Konsehal Malcolm Sanchez, chairperson sa committee on education, nagkanayon nga ang mga aplikante kinahanglan nga bag-ong graduate sa senior high school nga dunay general average nga 85 percent.
Iyang gidugang nga ang scholarship board wala pa makatino kon pila ka scholars ang ilang dawaton karong tuiga.
“We will meet next week to finalize how many applicants will be accommodated under the program,” nagkanayon si Sanchez sa interview niadtong Lunes, March 17.
Ang kagamhanan sa dakbayan nagtanyag og scholarship aron paghatag og educational opportunities sa mga kabos apan deserving nga mga tinun-an.
Gawas sa pag-abot sa mga academic requirement, ang mga aplikante kinahanglan nga mopaubos sa interview aron masusi ang ilang pinansyal nga pagkabutang.
Ang scholarship grant board maoy mopahigayon sa screening aron pagsiguro nga kadtong mga tinud-anay nga nanginahanglan og tabang ang makapahimulos sa programa.
Kadto lang mga kurso nga tag-upat ka tuig ang mapaubos sa scholarship. Ang summer classes dili malakip sa financial assistance, pasabot nga ang mga scholar dili makadawat sa ilang stipends atol sa summer term.
Aron makaapil, ang aplikante kinahanglang molupyo sa Mandaue City ug tulo na ka tuig nga nagpuyo sa ilang barangay, ug pamatud-an sa ilang barangay captain.
Kinahanglang nakahuman sa secondary education gikan sa public o private school sud sa tulo ka tuig sa iyang pag-apply ug mag-first year college.
Ang average grade 85 percent, ug sa matag subject walay grado nga ubos sa 80.
Ang mg aplikante kinahanglan nga mo-fill-up sa data sheet pinaagi sa online application portal, dunay certified true copy nga report card, ug barangay certificate of residency.
Kinahanglan sab nga mopakita sila og kamatuoran sa financial status sa ilang pamilya, mahimong kopya sa labing bag-o nga Income Tax Return nga dili molapas sa P250,000, certificate of tax exemption gikan sa Bureau of Internal Revenue, ug notarized affidavit of no income nga luwatan sa ginikanan o sa guardians./CAV