Nagsugod na ang mga kawani sa Mandaue City Treasurer’s Office ug sa Commission on Elections (Comelec)-Mandaue sa pagkuha ug paghan-ay sa yellow nga metal nga ballot boxes agi og pagpangandam sa umaabot nga Barangay Elections sa Disyembre.
Kini subay sa kamanduan gikan sa Comelec Central Office nga nagmando sa mga lokal nga opisyal pag-andam sa mga materyales sa eleksyon nga mas sayo sa schedule.
Kining mga ballot box, nga gitipigan sukad pa sa niaging piniliay, aduna’y sulod nga mga balota ug opisyal nga mga report gikan sa nagkalainlaing mga barangay, lakip na ang 2023 Barangay ug Sangguniang Kabataan Elections (BSKE).
Nagsugod na ang Comelec-Mandaue sa pag-abli sa matag usa sa 1,008 ka ballot box aron ihan-ay, hipuson, ug andamon aron gamiton na usab.
Ang tumong mao ang pagpahapsay sa pagtipig pinaagi sa pagsiguro nga ang mga dokumento ug materyales sa matag barangay tipigan sa usa ka ballot box, depende sa gidaghanon.
Ang ubang mga barangay kaniadto naggamit og hangtod upat ka kahon.
Gipasabot ni Comelec Assistant Election Officer Jacqueline Reuyan nga sa higayon nga ang sulod sa daghang kahon gikan sa samang barangay ibalhin na sa usa ka kahon.
Ang mga nakuhaan nga kahon susihon alang sa paggamit pag-usab. Kining mga sobra nga kahon itugyan ngadto sa Department of General Services (DGS) aron pintalan pag-usab ug ayuhon.
Usa ka imbentaryo ug report ang isumiter sa Comelec Central Office aron mahibaw-an kung aduna pa ba’y dugang mga kahon nga gikinahanglan alang sa piniliay sa Disyembre. / CAV, uban sa Interns